بقلم: ميرفت قاسم
لما سيدنا إبراهيم اختار هاجر المصرية وتركها وطفلها فى مكان صحراوي جاف بدون ماء ولا طعام
ليه ما اخدش السيده ساره وهى بمفردها لا انجبت ولأ متحملة مسؤولية طفل
●ليه تركتنا هنا يا نبي الله هل هذا أمر الله اينعم هو أمر الله إذن لن يضيعنا الله يعني دا إختيار المصرية لتلك المهمه طيب ليه المصرية لأنها صبورة قوية تتحمل الصعاب المصرية اللي من رحمها جاء ب أعظم الرجال إسماعيل عليه السلام المصرية رمز للحياه المصرية اللي ربنا جعل الصحراء القاحلة لاجلها ام القرى يتجه اليها العبيد والأمراء.والرؤساء
المصرية اللي رضيت بقضاء ربنا فجعل لها منسكا خاصاً من مناسك الحج الصفا والمروه
المصرية اللي من تحت قدمها يشرب العالمين أطهر واعذب ماء فى الدنيا التاريخ خير شاهد أن النساء في كل بقاع الأرض وعبر ازمنة مختلفة كانوا جوارى للمتعة فقط أما المصريات فكانوا ملكات يجلسن على العرش بجوار زوجها الملك او بمفردها لإدارة دولة بمنتهي الحكمة مثل حتشبسوت واللي عصرها شهد رخاء اقتصادي واحمس نفرتارى زوجة احمس الاول ونفرتيتي زوجة اخناتون وشجرة الدر المصرية لما خرجت من بلدها كانت خروجة شرف وفخر مرة تزوجت خليل الرحمن وأنجبت إسماعيل عليه السلام واصبح لها منسك من مناسك الحج والمرة الثانيه اللي خرجت فيها كانت خروجة مارية القبطية لتتزوج خير خلق الله سيدنا محمد عليه افضل الصلاة والسلام واللي أنجبت له ابنه إبراهيم فأصبح لنا حضور فى بيت النبوة
هل تعلم يا هذا يا من تتهم المصرية بأنها بضاعة رخيصة هل تعلم تاريخ مصر وملكات مصر هل تعلم أن حتشبسوت حكمت مصر ٢١ سنة اصبحت مصر خلالها اكبر قوة سياسية واقتصادية حتى فى المجال الفني عندما غنت المصرية. أصبحت كوكب الشرق واللي ربنا منحها أقوى حبال صوتيه لامرأه في العالم إنها السيده أم كلثوم غنت للنبي والمحبين ولمصر وكان لها دور لا يقل عن دور الرجال فى الوقوف بجوار بلدها خلال الحروب بالغناء واقامة الحفلات لصالح المجهود الحربي
عارف يعني إيه ست مصرية هى الفلاحة اللي بتكون فى كتف جوزها فى الغيط والبيت تساعد فى الزرع وتطبخ وتغسل وتخبز وتاخد بالها من عيالها
المصرية زوجة الشهيد اللي اترملت ورفضت تدخل راجل تاني على عيالها وقعدت هى تربي وتعلم وتكبر وقامت بالدورين راجل بره البيت وست وام جوا البيت
المصرية هى اللي فتحت باب بيتها لكم وقسمت معاكم اللقمة والملابس لما استنجدتم بمصر وقت احتلال العراق لكم هل رد الجميل بالسب والإهانة
المصرية هى مفيدة عبد الرحمن اول محامية مصرية اول من رفعت دعوة أمام المحاكم العسكرية اول امرأة استمرت فى البر لمان مدة ١٧ عام
المصرية هى فتحية العسال اللي اسست فصول محو الأمية فى السيدة زينب ودفعت عن حقوق المرأة
المصرية نبوية موسي رائدة تعليم الفتيات في مصر
المصرية هى عصمت الاسكندراني ام البحرية المصرية اللي اتبرعت بسفينة حربية كاملة من حر مالها
المصرية أمينة الحفني اول مهندسة فى العصر الحديث فى مصر وفى الشرق الأوسط
المصرية ابلة نظيرة صاحبة اول موسوعة عربية فى الطبخ وأشهر مؤلفي كتب فن الطهى
المصرية هى لطيفة النادى وعزيزة محرم اللي اقتحموا السماء وحققوا حلم الطيران
احذر يا هذا عند الحديث عن المصريات اللي ربنا أعطاهم الشرف بوجود ضلع لهم فى بيت النبوة بوجود إبراهيم الابن الوحيد لرسول الله من المصرية المصرية اللي يوجد منسك من مناسك الحج باسمها
المصرية سليلة الملوك ملكة بنت ملوك
هل انت نبى لتتزوج مصريه ؟
في احدى رسائل تل العمارنة التي يعود تاريخها الى 3500 سنة تم العثور على أشهر رسالة تظهر بها مكانة المصرية وانها سيدة نساء العالمين منذ الاف السنين
الرسالة ارسلها ملك بابل (كادشمان) لملك مصر (أمنحتب الثالث) يطلب فيها الزواج من أميرة مصريه لتوطيد العلاقات بين المملكتين
لكن دا كان مبدأ مرفوض عند المصريين المصرى يتزوج اجنبية أما المصرية لا تتزوج الا مصرى كان رد الملك المصرى انه لا يقبل زواج مصرية من اجنبي فرد عليه ملك بابل بأن (ابراهام تزوج أميرة مصرية إرسل لي أي فتاة مصرية ولن يعرف احد انها ليست اميرة)
فرد عليه امنحتب بالعبارة الخالدة على مر التاريخ ( ابراهام كان نبي .. طلبك مرفوض ) .
هل انت نبي لتتزوج مصرية
ودا اكبر دليل على مكانة المصرية منذ القدم وانها أعظم من ان يختلط دمها بدم اى جنسية أخرى
إلى كل سيدات وهوانم وانسات وعظيمات مصر لكم كل التقدير والاحترام. أنتن إختيار الله لنبي الله مدعومات بقوة الله… ماضيكم حضارة يشهد عليها التاريخ وحاضركم ومستقبلكم مشرق بوجودكم
