بقلم: ميرفت قاسم
هل تعلم أن للنساء مفردات خاصة بهن فى لغتنا العربية عزيزي الرجل أحذر من تلك الكلمات عند سماعها من المرأة
. أوك
عند الدخول في جدال مع المرأة وتقوم هى بانهاء المناقشة بتلك الكلمة أوك فهي بالفعل قامت بإنهاء الحوار ليس عن قناعة وأنما رغبة منها في التفكير لبعض الوقت والتدبير لعمل خطة محكمة لأخذ الحق مؤمنة بمبدأ اخد الحق حرفة وفى عقل بالها تقول اصبر عليا والله لأوريك
بص بقا هى لو قالت لك كده حاول أنت تنهي الموضوع بالموافقة والتصديق على كلامها
. ولا حاجة
هذا الهدوء الذي يسبق العاصفة
أعرف بقا يا جميل أن أيامك مش هتعدى على خير هتقعد تفكر ليل ونهار يا ترى بتدبر لي إيه وهترجع بالذاكرة لحد يوم فرحكم وتقول لنفسك يمكن زعلت لما جت نيرمين زميلتى فى الكلية عشان تبارك لنا وأنا وقفت جنبها أتصور وهى وقفت بعيد وقالت إنها مرهقة من كتر التصوير بس أنا اتصورت عادى يمكن الموقف دا وبعدين ترجع تقول لنفسك ولا يمكن فى عيد ميلاد إبنك عمر ساعة زميلتك فى الشغل قالت لعمر أنه زى القمر طالع ل بابا بص بقا من الآخر حاول تعتذر علي الشئ اللي أنت مش عارفه وخلاص
. لا عادي
أخطر التصريحات اللي ممكن تتخيلها بمعني لا بقا سبني أفكر كده وربنا ل اخليك تلف حوالين نفسك بقا انا تعمل معايا كده أقولك عايزة اروح السخنة فى إجازة نصف السنة تقولي مش عامل حسابي والميزانية لا تسمح طيب وتقعد تفكر لك ماشي يا حبيبي أنا موبايلي مهنج عايزة واحد جديد وعمرك ما هتقولها لا ليه بقا لو قلت لا هتقولك هو الموبايل هنج من إيه مش من كتر الرسايل المحملة عليه عشان خاطر ولادك اللي بتابع كل واجباتهم على جروبات الماميز عشان اعرف عاملين إيه فا من الآخر غير لها الموبايل وأنت ساكت أو وديها السخنة فى إجازة نصف السنة
. براحتك
هذه كلمة تحدي و تحذير يعني لو شاطر أعمل كده تقولك كده وهى بتغمز بعينها كده تقولك لو شاطر كده لو شاطر أعمل كده لا شكراً
يعني من الآخر هى حالياً تحولت لقنبلة اللي هيقرب منها هتنفجر فى وشه وهتنزل عليك لعنات من أيام ما اخناتون اتجوز على نفرتيتي لحد وقتنا دا
. آهااا
بمعني لا والله ودا معناه أنك موضع شبهات يا حلو مشكوك فيك فحاول تحل بقا بدل ما تخليك تحفر قبرك بإيدك لا وتوصي كمان على الشريك واليوسفندى اللي هيطلعوا بيه القرافة ويوزعوه على روحك رحمة ونور
ماشي
وعد بالانتقام وتدبير طريقة للخلاص منك هى تقولك ماشي انت تقعد على طول وتحاول تحايل فيها قولها مثلاً حبيبتي انتى خسيتي اوى هتفرح وتنسي هى زعلانة منك ليه
. مفيش
تيجي تسألها مالك مفيش فى حاجة زعلانة منها لا أومال مالك ماليش وبعد مجهود وتعب ونشفان ريق تقولك مخصماك زعلانة منك تقولها ليه أنا عملت إيه طيب أنا آسف تقوله على إيه يقولها مش عارف تقوله ما لو أنت مهتم كنت عرفت واتضح فى النهاية أنه قدم لها هدية عيد ميلادها فى تاريخ عيد ميلاد حبيبته الأولى وعينك ما تشوف الا النور هتتفنن فى الانتقام منك ده ممكن تقدم فيك شكوة لوزير التعليم أنك كنت بتغش وأنت فى ابتدائي
تعرف عشان تصالحها تعمل ايه تكون لها صديق تفضفض له وقت حدوث أي مشاكل وندخل بقا على بند التوفير فى ميزانية البيت هتحبك أوى خليك كهربائي اى حاجة تعطل صلحها وسباك يا حبيبي سلك حوض المطبخ تسلك ونجار
لو أى كرسي أو تربيزة عايزة تصليح واوعي تنسي تكون رومانسي تقولها شعر كمان و
أب صالح نموذج مشرف و
شجاع تجرى وتطارد الصرصار والفار بكل شجاعة والأهم بقا
وحيد بدون صديقات ولأ زميلات عمل وأوعي
تنسى شوية مدح كل شوية كده أهم كلمة أنتي خسيتي يا حبيبتي هتحبك أوى وتديك نايب كبير من الفرخة آه والله زى ما بقولك كده وأوعي تنسي الهدايا بمناسبة عيد ميلادها وعيد زواجكم وذكرى الخطوبة وعيد الحب وعيد العمال كمان غير بقا شوية حركات بنحبها زى
فتح باب العربية لما تخرجوا سوا خد بالك لو ما عملتش كده هتنزل وترزع باب العربية تخلعه وانتو ماشيين بالعربية واى ست تعدى اياك تبص عليها ولو هى قالت لك الست ده لابسة فستان حلو أوي قولها لو عليكي انتي هيكون أجمل
بص يا سيدى الستات بتكره
حاجات عكس بعضها أنك ترد عليها
وفى نفس الوقت أنك ما تردش وتبقى صامت ما أنت لو مهتم كنت عرفت لوحدك
أظن المرأة بسيطة جداً
