بقلم: ميرفت قاسم
كنت معزومة فى عيد ميلاد صديقة لي من Egypt عرفتها من على الفيسبوك روحت عيد الميلاد يا جماله ايه الروقان والشياكة والدلع دا
صاحبتي ده متجوزة راجل محترم طول الوقت يلف ويرجع يقولها مبسوطة يا حبيبتي ناقصك حاجة ويجي ماسك فى ايده وردة مرة وعصير مرة وهى ترد عليه ميرسي يا بيبي وانا قاعدة مزبهله هاتقولوا يعني ايه مزبهله هقولكم مش عارفة هو دا الاحساس اللي جاني ودا اللفظ اللي خطر على بالي بصيت حواليا لقيت كل الستات من نوعية صاحبتي دى
عرفت بقا الفرق ما بين ستات Egypt والستات اللي من مصر
لما يكون كل حديثهم عن الاختراع الجديد المذهل اللي ظهر مؤاخر لنواة البلح وازاي انهم منبهرين بالهير ماسك اللي عملوا مؤاخر عشان يستعدوا لحضور هذا العيد ميلاد واحدة فيهم بتقول انا عملت الهير ماسك دا لما اطمنت لمكوناته فانا بقا حبيت يكون ليا دور و انى على علم ببواطن الأمور قلت لها آه طبعا دا أهم حاجة المكونات تكون طبيعية انا بستعمل ماسك لشعرى بزيت الزيتون بصت لي باستغراب وقالت لي نو بلاش تعملي زيت زيتون مبقاش موضة قلت لها المهم النتيجة قالت لي نو دا اثبت انه ضار قلت لنفسي خليكي معاها للآخر وجوا نفسي حسيت انها بتبص لي على اني طبق سلطة ما هو برضوا زيت زيتون ايه بس اللي قلته دا ما علينا قعدت اسمع كلامها قالت لي الهير ماسك اللي عملنا كلنا زى ما انتي شايفة تحفة مخلي شعرنا ناعم ويلمع وطرى عشان مكونات طبيعية في زبدة الشيا وزيت الكافور ونواة البلح
قلت لنفسي وانا خلاص هعيط يا لهوي على نواة البلح اللي رميته فى رمضان وانا بعمل البلح ابو لبن للفطار وزبدة شيا ايه يا اوختشي دا انا معرفتش اجيب ربع كيلو اعمل به شيكولاته للولاد فى العيد وزيت الكافور انا عارفة انه لعلاج التهاب المفاصل والعظام
زى فيلم صباح الخير يا زوجتي العزيزة لما جابوا راجل يشتغل عندهم وطول الليل كان بيقول آه يا مفاصلي ادهني يا بنتي ايديك بتريحني كانت بتدهن له بزيت كافور يا دا الناس بتوع Egypt طلعوا غير بتوع مصر خالص مالص بالص
هو كان عيد ميلاد الماسكات واحدة تانية كان وشها بيلمع مش عارفة ازاي دا ايه بالظبط بدأت هى برضوا الحديث وكأنهم فى سبق واستعراض مين فيهم على دراية بأحدث الماسكات للشعر والبشرة قالت ان الكوافير بتاعي عمل لي ماسك للبشرة برضوا مكوناته كلها طبيعية نواة البلح الجوجوبا زيت الاركان والافوكادو والالوفيرا والخيار وعملي سكراب لبشرتي زى ما انتو شايفين كده بس انا الحمد لله عرفت حاجتين من كل الحاجات و المكونات بتاع الماسك بتاعها دا
آه طبعا انا على دراية بالموضة الخيار لما ولاد اختي مش بياكلو السلطة كلها وبلاقي فيها خيار بعمله ماسك تحت عيني يرطبها والافوكادو دا لما احب ادلع نفسي بعمله عصير انما والله يا اوختشي مجربتش عمله ماسك لوشي
حلوة الستات لما تكون رايقة دول بقا بتوع السيرم اللي بيروحوا النادى عشان يستمتعوا بالصن ريز عشان يخدوا فيتامين e وcو b
وكل الفيتامينات اللي الشمس بتقوم توزعها علينا
احنا بقا بنقوم من النوم نقول يا صبح يا رب عدى اليوم دا على خير واول ما اوصل شغلي بقول للناس اللي شغاله معاهم
مش معني إني لبست ونزلت وركبت عربيتى وروحت الشغل وإتكلمت معاك إني كده صحيت
فحاول تتلاشني عشانك مش عشاني اصلا انا بصبح عليهم بهز الراس او رفع الحاجب هو انا لسه هتكلم الواحدة مننا بتقوم من النوم بتكون بسبع أرواح تلبس الولاد وتحضر اللانش بوكس وتلبس الاسدال وتنزل تجرى عشان الولاد يلحقوا الباص او تلبس وتنزل تاخد اى مواصلة عشان توصل ولادها مدارسهم ونسبة بسيطة محظوظة بتكون المدرسة قريبة من البيت بعدها والغالبية العظمي كده بتجري تلحق شغلها وترجع برضوا بنفس الوتيرة السريعة من شغلها للبيت عشان تحضر غدا للولاد ثم عمل الواجبات المدرسية ولو هتنزل حد السنتر تنزله ولو حد عنده تمرين توصله وترجع للمواعين بتاع الغدا ثم تحضير عشا ومواعين عشا ونوم عشان تبدء المفرمة من تاني ولما تفكر تاخد بالها من نفسها بتعمل اى ماسكة من اللي بتشوفه على اليوتيوب وبيكون ايه زبادى بالخيار ولأ جيلاتين بالقهوة حاجات بسيطة مش مكلفة حتي لو انضمت لمجموعة على الفيسبوك بتكون ايه حاجات خاصة بالمطبخ او حاجة تهم الولاد او جروب لاغاني كلاسيك لما تكون فى مود حلوة وعايزة تدلع نفسها بكوباية كابتشينو ولأ فنجان قهوة مظبوط
الستات فى Egypt غير عالم تاني مالوش علاقه بينا هنا الناني بتعمل كل حاجة تغذية مذاكرة لعب وترفية كل حاجة خاصة بالطفل لدرجة اني شاهدت فيديوهات لبعض الأخوات من المصريين و الأشقاء العرب الطفل بيروح للناني ويقول لها يا مامي وامه واقفة ولأ حاسس بها ممكن يكون موضوع الناني مفيد لو الام مشغولة عندها عمل واخد كتير من وقتها ف الناني تساعد معها وهى موجودة انما الموضوع كله يكون فى ايد الناني لا طبعا الأم لا غنى عنها ودورها اساسي فى تربية وتعليم الطفل سواء كانت من Egypt او من مصر لكن الأكيد ان
المصرية الورد يأخذ عنها بعض رقتها
وما لها في جميع الخلق أشباه..
وكما قال “بن ظهيرة” أحد مؤرخى العصر المملوكى
المصريات ارقهن طباعاً وأجملهن شكلاً وهو يقارن بينها وبين غيراها من النساء
