قصيدة ( يا طيبة ) 

 

 

قصيدة  د. أسماء عَجلان  

 

آهين ويا طيِّبَه..

يا قُلَّه ومَسابح..

يا غنوتين في الصِّبا..

والقَد عود طارح..

السِّحر فيكِ هِبه..

مِن رمش عين سارح..

والحب ده موهبه..

مع فجر يوم صابح.

قوليلي في الأَوِله..

الطِّيبه دي من فين؟!..

من عِشق بنت و وَلاَ..

ولاَّ تاريخ وسنين..

سابوا الحَضر والفَلا..

يدعوا وقالوا: آمين..

مين داق هواها مَلا..

بالشوق إليها حنين..

قوليلي يا طيبه..

الطيبه دي من فين؟!

جابوا التاريخ والعِبر..

وجابوا حَبة ناس..

من عهد أم البشر..

لحد – قول- رمسيس..

ومنه كتبوا السِّيَر..

ونوروا الفوانيس..

ولما عملوا الصور..

شافوا تاريخنا عريس..

عروسته في الزفه..

تمشي وتتهادي..

لا هايبه لا خايفه..

ع العز معتاده..

لَف الزمن لفه..

وحَن كالعاده..

ع المُلك محترفه..

دي ( مصر) يا ساده..

قوليلي يا طيبه..

الطيبه دي من فين؟!

طلوا من الشباك..

وبَصُّوا من تاني..

لقيوا الفراعنه هناك..

شافوا الحكيم ( آني)..

كاتب علي الأفلاك :

ده السحر رباني..

أنا في طبعي ملاك..

وأبويا رباني..

وعَملُّه تعويذه..

تحمي ( نفرتيتي)..

من ( طِيبَه) للجيزه.

ألبسها وبناتي.

دي حره وعزيزه..

وحلوه يا اخواتي.

أصل الجمال ميزه..

في عُرف مولاتي.

قوليلي يا طَيِّبه..

الطيبه دي من فين؟!

من عهد ( موسي) النبي..

ولاَّ أخيهِ ( هارون) ..

من عهد ( عيسي) صبِي..

و(العَدْرا ) أُم حنون ..

من عهد سيدنا النبي..

ولاَّ ده رب الكون؟..

أمَرِك وقال : اكتبي..

قبل التاريخ ما يكون..

قوليلي يا طَيِّبه..

الطيبه دي من فين؟!