بقلم/ ميرفت قاسم
أنا وصاحبتي خرجنا نفطر في المطعم الجديد بتاع بوراك طلبنا ايچيبشين شاكشوكة وبابا غنوج وقهوة تركي وعيش وميه وجبنة وأنا بشوف المينو لفت نظري أسماء غريبة مين دول يا جماعة
بلاو تشيكن ب 1500 وعلي نازيك ب 950 انا قلت يمكن نازك السلحدار هى اللي بتقدم الطبق بنفسها وبعدين شكشوكة ايه اللي ب 180 ولا مؤاخذة مش اللي تتشك ده برضه هى بيض وطماطم وفلفل وزيتون أنا لو عملتها فى البيت أربع بيضات ب 24 جنية ونص طماطم ب 10جنية وزيتون وفلفل الموضوع كله مش هيحصل 70 جنيه تقولي 180 ليه يا حاج الميه ميه النيل سلسبيل زى ما بيقولوا الإزازاة ب 40 جنية صراحة رخيصه بس إحنا بقي متعودين نشرب من الزير ميه نقيه مش محفوظة فى زجاجة بلاستيك غيرت خواصها الطبيعية حمص باللحمة ب 395 جنيه ليه يا خويا دا انا عليا شوية كرشة بالحمص متقولش لعدوك عليهم تاكل صوابعك وراهم واحد مانجو ب 320جنية ياخويا تعالي شوف المانجة وانا مسرحه شعرها دا احنا بناكلها بقشرها 2 كوب شاى تركي ب 90 جنية يا أخي دا باكو ال ليبتون ب 75 جنية العيلة كلها تشرب وتستمخ على رأى عبعال فى رية وسكينة أسبوع بحاله كله كوم بقى وده كوم مفاجأة فى طاجن ب 475 جنية ليه طابخ خروف فى الطاجن لا وواحد على نازك ب 1500 مين على دا يكنش على عليوه اللي ضرب الزوميره أنا عارفة أم على كيلو لبن وميلفى وشوية زبيب ومكسرات وتاكل أم على وأبو على واخوات على كلهم ومعاهم نازك السلحدار مش نازك بتاعتك خد ده كمان بقلاوة شرائح جزر 320 جنية فكرتني ب جميز عسل فى فيلم المليونير وهو بينادى انت يا عم يا جزر جديدة خالص ده انا عارفة بسلة وجزر عسل وطحينة هههههههه الجزر يقوي النظر لما أخد الرتبة يدوب بقى مربي إنما بقلاوة جزر يخلق ما لا تعلمون لسه في كمان لحم بقري على طريقة بيلين 950 جنية ايه بقى طريقه بيلين مين الأخ صاحب بالين دا
انا معرفش غير طريقه اليخني بتاع عادل امام
فرخة ب 1900جنية ليه من سلالة ملكية
طبق ورق عنب ب 6000 جنية انا ممكن اعملك حلة ورق عنب آخر لذاذة عندنا أم فاروق جارتي العنباية بتاعتها طرحت ما شاء الله حلل حلل ورق عنب وحاجة ببلاش كده
ما علينا انا كل اللي اعرفه حاجة واحدة كل شخص زار المطعم ده علشان ياكل من ايد بوراك دخل وهو فاكر السلطانة هيام هى اللي طبخت له عايزة أقولكم مش لازم تاخدكم المنظرة وتروحوا مكان بعدها تندبوا وتنزلوا الفاتورة عشان تعرفونا أن معاكم شوية فلوس أرحمونا من المنظرة الفارغة ده وطالما انت دخلت عنده تتحمل إرتفاع أسعاره
