تعرف ازاي أن اللي قدامك دا مواطن ساحلي أب عن جد ولا ساحلي مستجد بسيطة ورقة وقلم ومرايا واكتب يا سيدى ورايا الساحلي بالوراثة اللي دارس أكاديمية عالم البحار الخبير طبعا مش المقصود الدكتور حامد جوهر رحمه الله عليه إحنا هنا بنتكلم عن المواطن الساحلي اللي شاطر في التفريق بين صوابع زينب والريتشويلز أو البوبس هو نفسه الخبير المحنك اللي بيقول جوجر و سويت بانتس بدل بنطلون
لو بصينا على الساحل الشمالي هتلاقي أنه مر عليه مراحل كتير لحد ما وصل لحالته دى الأول جيل المؤسسين كانت بدايته ناس طبيعية شبة ناس زمان أيام أفلام الأبيض والأسود أيام الرقي فى التعامل والشياكة فى الملابس ناس بسيطة عايز تصيف تغير جو ملابس شيك وبسيطة دون بهرجة حتى ذوقهم فى الموسيقي والأغاني يميل للهدوء وكأنهم كانوا خارجين من إطار صورة قديمة من الخمسينات محافظين ورافضين السلوكيات العشوائية اللي ظهرت على السطح مؤخرا لسه فيهم لمسة جمال من الزمن الجميل بس خسارة مش قادرين يصمدوا أمام طوفان العشوائية
بعدهم وصل جيل الفيلر والبوتكس ناس كلهم شبه بعض ملامح واحدة منقدرش نعرف مين ده ومين ده أصبحوا نسخة واحدة والبركة فى عمليات التجميل اللي محت شكلهم الطبيعي خلقة ربنا وحل محلها وجوه وأجسام بلاستيك وابتسامة محبوسة مش عارفه تخرج بسبب عمليات الشد والنفخ دول بقا
احتلوا منطقة الساحل من مارينا كلها بقت تحت أمرهم من المنطقة 1 لـ 7.
بفلوسهم حابين يعيشوا اخذوا من الفلوس وسيلة للراحة منبهرين بكل ما هو جميل وجديد فى الموضة والحفلات وماركات العربيات لكن في حدود الذوق والشياكة بيحاولوا يتشعبطوا فى الجزء اللي فاضل من الذوق اللي كان
ناس شبه الرخام بيلمع أوى زيادة عن اللزوم
جيل الفوضويين
خد بقا من مراسي وما بعدها الساحل انفتح على البحري الست هادية بمايوهاتها الغير هادية اللي أقل مايوه ب اربع خمس أصفار على اليمين طبعا بألوانه الفاقعة أصفر أحمر أخضر كل ألوان الطيف تلاقي سوزي بالأحمر بتكيد نادين اللي اشترته فوشيا ده ناس بتنزل الميه بمكياج كامل ضد الميه مش بغرض العوم والتمتع بميه البحر تؤتؤ نوقه نوقه على رأى إسماعيل ياسين لا دول عايزين يخرجوا من الميه حلوين يعني الميه غسلت وشهم وطلعوا قمرات برضوا دا غير ما بتكون لابسة جزء من مجوهراتها وكأنها معزومة على حنة شيماء عاملين زى حمو بيكا كده وهو لابس شورت وقميص مشجر و كوتشي ولابس كيلو دهب النوع دا هو اللي بيحاول الحصول على نمرة مميزة لعربيته ويتكون عربية اخر موديل بيحبوا يرقصوا مع المغني فى أى حفلة بيحبوا يصوتوا مع المغني يعني لو لقيت حد وانت حاضر حفلة من دول صوت جمب ودنك أوعى تخاف ده مش واحدة بتولد ولأ واحدة جات لها الزايدة لا ده مبسوطة شوية من الحفلة نوع يعشق الفوضي
بيقولك إحنا أهو اي نعم مفيش ذوق فى الملابس وتناغم الألوان ولا تسريحة الشعر والأكسسوار المناسب المكان بس بيقولك إحنا نوع موجود وبيفرض نفسه بقوة وسطوة المال حتى لو أفسدوا الذوق العام
ندخل على التقايل بقا الناس اللى فوق بتوع رأس الحكمة بيقولك إحنا معانا فلوس وكتيرة أوى بس إحنا لازم نكون مميزين ومحبوبين طب نعملها إزاي ونعمل فرق بينا وبين بتوع الساحل الشرير أقولك يا سيدى إحنا نحاول نرجع لزمن الهدوء بمعني نقلد بتوع زمان اللي كانوا بيعشقوا الهدوء مفيش صوت عالي وصخب حفلات بيكا وشاكوش نلبس على الموضة لكن بذوق حفلات خالية من الصويت والصراخ اللي البعض بيعتبره وسيلة للتعبير عن الإعجاب وشعور بالسعادة
دول بقا اللي نقول عليهم زى سكينة اخت ريه لما قالت على جوزها ابو المفهومية بمعني ده ناس فاهمة هى عايزة تعمل ايه بتستمتع بس وهى فاهمة مش حافظة وبس
الساحل تحول من مجرد مكان لمقياس لتصنيف البشر وطبقاتهم الاجتماعية اللي فرضتهم عليهم حالتهم الاقتصادية الساحل بقا فى الغني والأغني منه تحول الهدف من تقضيه وقت فراغ فى العطلة الصيفية والاستمتاع بالهواء والمياه والصحبة الحلوة كل دا راح وحل محله المنظرة والفشخره الا من رحم ربي
