بقلم: ميرفت قاسم
عندنا فى مصر لما تقول لحد ازيك الرد الطبيعي الحمد لله لكن لو طول قبل ما يرد يبقي بيفكر خايف تكون عايز حاجة يقعد يقول لنفسه خير يا ترى عايز ايه اكيد عايز خدمة أو حاجة هو هيقولي ازيك كده لله فى لله وتقعد تقول بينك وبين نفسك ربنا يستر هو بيسألني عن حالي ليه انا هقوله تعبان شوية والشغل مشاكله كتير الإحتياط واجب مش ناقص قر
ربنا يسهل
ده بقا عندنا لا تحمل معني التسهيل لا دا عكس كده خالص احنا هنا عايزين نقول طنش فكك مني انسي ودا عدم موافقة مبطنة برد مهذب على موضوع او اقتراح اتقالك
نحن نختلف عن الاخرين
خلي عن بتسمعها كتير خاصة من البائعين تشترى فاكهة أو أى خضروات مثلا وتستغلي السعر تحاول تفاصل ولأنك فاشل في الفصال بتخسف بسعر الحاجة الأرض فبيكون رد فعل البائع هو خلي عنك مش قبول الفصال ولكن سخرية منه بمعني تحب تاخد الحاجة من غير فلوس خالص وادفع لك انا كمان حقها
اتفضل معانا عزومة على الماشي مش من القلب ولأ حقيقية عزومة مركبيه
عشر دقائق يا بنتي واكون عندك وهى لسه في السرير وهتقوم تدخل الحمام وتلبس وتفطر وتطلب تاكسي
فعلا وربنا مختلفون
إن شاء الله مش وعد أن اني هنفذلك اللي انت طلبته لا ده معناها فى المشمش ابقي قابلني لو دا حصل
أوقات كده لما تركب أسانسير مع صاحبك الغلس يقولك تخيل لو وقع بينا عايزني اتخيل ايه حرام عليك تخليني الكام دقيقة دول افكر أن الاسانسير بيقع أو اتحبسنا فى وهنخرج من الحيطة زى فيلم بين السما والأرض انا عن نفسي هتخيل اني باكل من الديك الرومي اللي فوق صينية البطاطس اومال نحن نختلف عن الاخرون المصرى معروف بخفة دمه وقدرته على اضحاك طوب الارض ومعروف عنه سرعة البديهة أو زى ما بيقولوا إلافيه بتاعه حاضر مثلا
تبقي قاعد بتفطر فى النادى مع أصحابك ويجي حد من بعيد اول ما أصحابك يلمحوه يقولك حبيبك وصل والمعني فى بطن الشاعر حبيبك هنا دا شخص بتكره كراهيتك للصحيان بدرى والنزول فى يوم شتوي بارد عشان تروح شغلك
تقابلي صاحبتك تقولك عايزين تروح تبارك لنرمين خلفت تقول لها هى كانت حامل
يعني اومال خلفت ازاى يا بنتي نزلته من اليوتيوب ولأ كانت محملا على سي دى
الشاحن بتاع الموبايل لما يتوه منك وتلف البيت عليه وتيجي تسأل اختك لو كانت شافت الشاحن ويكون ردها انتى كنت حاطة الشاحن فين ما هو انا لو فاكرة هسأل ليه
نحن نختلف عن الاخرون يا عمري
تواعد صاحبك تقابله على الكافية والمرور والزحمة تأخرك اول ما يشوفك يقولك ما بدرى وده طبعا سخرية يعني انت اتأخرت اوى صاحبك يقولك والله الزحمة هى اللي أخرتني تقوله مصدقك ودا معناها انت كذاب كذب الإبل
مش بقولكم نحن نختلف عن الاخرون
تيجي خارج مع أصحابك امك تقولك رايح فين تقولها جاي على طول يا ابني انا قلت لك انت جاي على عرض انا بقولك رايح فين قولي المكان الفلاني وبلاش انا رايح فين انا راجع تاني ده
صاحبك يطلبك فى البيت على التليفون الارضي يسألك بكل براءة انت فين يعني هكون فين نزلت السوق اجيب كام كيلو طماطم وساحب سلك التليفون معايا في السوق
كل كوم بقا وده كوم تاني لما صاحبتك تيجي تفوت عليكي عشان تنزلوا سوا تعملوا شوبنج وانتى خارجة من الحمام وكل خد عليه خوخة والفوطة مبلولة تقوم تسألك أنتى مستحمية
لا انا مبلولة عشان كنت واخد غطس فى المالح كنت عايزة اعدى المانش
ارجع من شغلي تعبانة وواقفة مستنية الاسانسير ويجي واحد واقف جنبي يقولي حضرتك طالعة لا مستنية الشقة هى اللي نازلة انا لسه رنه عليها وقالت لي أنا نازلة اهو
ويا سلام لو اتفقنا نروح مصيف مع الأصدقاء وعشان عددنا كبير بنركب عربيتين الكوميدي فى الموضوع أن كل ما العربيتين يقربوا من بعض نقعد نشاور لبعض كأننا بنتعارف على بعض نشاور لبعض ونضحك يا جودعان ما احنا لسه كنا مع بعضينا على الكافية وخرجنا ضربنا سندوتشين كبده بالشطة من العربية اللي قدام الكافية ولأ يكونش دا اول تعارف بينا يا جودعان
عندنا كمان الولاد مختلفين عن ولاد الأجانب
الطفل الأجنبي لو مامته ضربته ممكن يتعقد عندنا نبع الحنان تمسكه ترزعه علقة ما ينزلش دمعة ويجرى وهو بيضحك ويقولها ما وجعتنيش
صاحبك يقابلك ويشوف عربيتك مخبوطة يسألك ايه دا حادثة ده لا والله يا اخى ده أصلها زهقت من شكلها وداخلة قصة حب جديدة مع عربية مايباخ ففكرت تعمل new look عشان تكون قد المقام
خد بقا نبذة عن نبع الحنان الحاجة امك لما تدخل عليك الاوضة بالليل وانت فى سابع نومة وصوت شخيرك واصل لآخر الشارع
أسألك أنت نمت لا يا حاجة بعمل بروفة تنزل تصلي الجمعة واحد يقابلك ويشوفك
ﻃﺎﻟﻊ ﻣﻦ ﺍﻟجامع
يسألك هي الصلاة خلصت
ﻷ والله دا احنا فى البريك الإﻣﺎﻡ ﻃﻠﻌﻨﺎ فسحة سبني بقا عشان اخلص السندوتشات لحد الامام ما يرن الجرس
احنا شعب عنده فطره جميله ذكاء وجدعنة وخفة دم و شهامه
تركيبه انسانيه كده فيها كل حاجه
علشان كده ربنا سترها معانا رغم اى صعوبات وكرمنا دايما ولله الحمد
