بقلم: ميرڤت قاسم
فى مواقع التواصل الاجتماعي تبدأ الحكاية ب هاي ازيك ممكن نتعرف فى ناس بتتجاوب وناس بترفض التواصل خارج الفيسبوك حتى المتجاوب في اللي بيكون نيته حسنة وفي صاحب النية السيئة لكن انت مين عشان تقدر تعرف نوايا البشر قبل الوقوع فى مصيدة الفيسبوك البداية هاى ازيك الحمد لله بخير
وتبدء سلسلة من الاسئلة لا نهاية لها انتي منين عندك كام سنة متجوزة وبعدها بثواني تبدء مكالمة صوتية من الفيسبوك ردت عليها يعني متجاوبة ايام بسيطة وبعدها مكالمة فيديو كول وبعد ما تعرف عنده كام سنة وبيشتغل ايه ومرتبط ولأ لا يطلب منها يتقابلوا فى مكان يخرجوا يتعارفوا على بعض ولو حصل بينهم توافق ممكن جدا لو الظروف مناسبة يرتبطوا ودا حصل فعلا من تعارف تم على الفيسبوك وده النهاية السعيدة زى افلامنا العربي القديمة
نوع تاني بنفس البداية هاي ممكن نتعرف وتبدء الحكاية بكل الخطوات السابقة مع اختلاف الظروف المرة ده بعد ما يتم التعارف وعادة الرجل البداية من عنده بعد التعارف وبدايات الاعجاب اللي هيقلب بعدها حب وبعد الخروج والوعود تكتشف إنه متجوز ولكنه على خلاف مع زوجته اللي مش قادرة تفهمه وان الجوازة كانت مفروضة عليه بحكم القرابة وإنه معه ولد وبنتين وعليها هى انها تقرر اما تكمل معه إذا كان شخص ملتزم وطلب منها الزواج اما انها تقبل وتكون زوجة تانية او ترفض وتنهي الحكاية
يا عزيزي المواطن الفيسبوكي انت ليه بدءت حكايتكم بالكذب فيها ايه لو كنت بدءت بالحقيقة وتركت لها حرية الإختيار كانت هتحترمك اكتر ده حالة متعلقة بين السما والارض
في حالة تانية بنفس الظروف لكن المواطن الفيسبوكي هنا كان بيقضي وقت فراغ لحين حل خلافاته مع زوجته وبعد انتهاء الخلافات رجع لحياته واولاده ونسي وعوده البراقة اللي كان بيلف بها دماغ الزبونة وبيثبتها كانت بالنسبة له مسكن موضعي لحين عودته لحياته الطبيعية
تالت نوع دا اقبح نوع لكن فى الواقع الخطا يقع على الطرفين ست عندها مشاكل مع جوزها اعتقد كان من الافضل انها تحكي لحد من اهلها مامتها باباها إخوتها او صديقة إنما تحكي لصديقي الفيسبوكى لا يا ماما دا صياد شاطر والميه عكرة ممكن بيتك يتخرب وانتي المسؤولة بينكم شات بتشتكي في من توتر العلاقات بينك وبين جوزك فى العموم بعدها دخلتي فى تفاصيل خاصة بينك وبين جوزك متوقعة من صديقك الفيسبوكي الحل
اولا خطا جدا اللجوء لغير اهلك خاصة لو المشكلة خاصة بحياتك وزوجك هى المفروض ما تخرجش بره اوضة نومك وتحاولي حلها انتي وجوزك فشلتم يبقي اللجوء لاهلك
تضمني منين صديقك الفيسبوكي دا إنه مايزودش النار اللي بينكم عشان يصطاد في الميه العكرة ابسط حاجة يبعت الشات لجوزك ويخرب عليكي ممكن يبتزك ماديا او عاطفيا دون الدخول في تفاصيل لكن واضح المقصود من الابتزار وده فى الحقيقة مشكله حلها عند الله وحده
وللانصاف زى ما في رجاله صيادة ماهرة في ستات وبنات كمان بيصطادو من الفيسبوك
بنت تتعرف عليك يمكن تخرج بعريس مناسب تتعرف على واحد واتنين وعشرة يمكن تقابل الشخص المناسب بتكون عندها مواصفات فارس الاحلام الغني الوسيم الشيك اللي بجوازها منه هتخرج من سيطرة وتحكم الاب والاخ فى الخروج والدخول وبلاش اللبس دا وبلاش عيد ميلاد صاحبتك واكبر تاخير بره البيت الساعة تسعة
ودا تفكير طفولي وخطا اكيد
نوع تاني من البنات عاملة كده زى المواطن الفيسبوكي صاحب مقولة هاى ممكن نتعرف هى كمان كده بتتعرف بس على مين على حد يقدر يصرف عليها ويخرجها ممكن ميكونش بغرض وحش النوع دا مؤمن بمبدء انيسة وعديلة الكحكية فى مسلسل ريا وسكينه كانت انيسة بتقولها انا ماليش فى المشي البطال ردت عديلة وقالت لها لا بطال ايه اعوذ بالله احنا نروح عند ريه نتعرف على رجلين يصرفوا علينا نشربوا كاسين نخروجوا نروحوا الرمل نركبوا الكهربا غدوة مرة عشوة مرة إنما بطال لا
هههههههه دا كمان تفكير ملتوي وصاحبه مريض نفسي لانه انسان مستغل
فى كمان بنات ورجالة دول بقا اعوذ بالله يتعارفوا على الناس بطريقة لا يعرفوا فيها ادب ولأ اخلاق والاكيد ولأ دين ده ناس متعرفش ربنا يبعتوا صور مخلة ودا نوع موجود من الطرفين ربنا يحفظنا جميعا من شرهم
فى نموذج تاني ل ازواج انفصلوا الزوج ارتبط بواحدة تانية واتجوزها فكان رد فعل الزوجة الأولي أنها اشتغلت على نفسها بمعني عملت نيولوك شعرها وتصحيح نظر وعدسات ملونة وبوتكس وفيلر وغيرت استايل ملابسها وكل يوم تنزل استورى شكل على صفحتها وهى فى أماكن مختلفة عشان تثير غيرة طليقها زى ما تكون بتقوله طلقتني طب اهو شوف خسرت ايه والزوج يقعد بقا متنكد على فراقها وتحصل مشاكل مع زوجته الجديدة طيب يا ست الكل كنتي اهتمتي بنفسك من الاول ووفرتي كل المتاعب اللي حصلت بينكم وانتهت بالطلاق وبدأت بينكم حرب الله اعلم هتنتهي ازاي
الفيسبوك دا نموذج مصغر من عالمنا الخارجي زى ما في خير وشر فى الدنيا فى كمان خير وشر خلف الشاشة الزجاجية اللي بحجم قبضة اليد لكنها جمعت كل النماذج
الموجودة فى حياتنا الحلو والوحش مش كلها طبعا وحش الا من رحم ربي
عزيزي المواطن المصري العربي الشرقي علي الفيسبوك. …..
لازم تعرف أن
مش كل بوست له مغزى آخر أو معني غير مباشر إلا لو انت عايز تفهمه كدة فى ناس بتحب تسمع اغاني زمان ل ام كلثوم وحليم هل معني دا أن اللي بيحبهم أو بينزل اغانيهم يكون عايش قصة حب مثلا لا اطلاقانهائي إنما الموضوع حكاية أذواق مش اكتر
مش كل حد كاتب دعاء أو ابتهال يبقي عنده مشكلة إلا لو انت متعود تلجأ لربك في الأزمات
ولو لقيت حد بيتكلم عن صلة الرحم يبقي بيواجه مشاكل مع أسرته
لو لقيت حد منزل بوست عن غدر الأصحاب يبقي قصده عليك وبلاش احساس اللي علي رأسه بطحة
مش كل واحدة كاتبة عن الخيانة يبقي جوزها خانها، ممكن تكون بتتكلم بصفة عامة بس خيالك صورلك كدة
مش كل حد كاتب حاجة عن أمور الدنيا يبقي بيلقح كلام علي حد معين إلا لو ده اسلوبك في حياتك
مش كل حد كاتب عن الحب يبقي عنده علاقة سرية والا توقف الشعراء عن قصائد العشق
مش كل صورة لها معني ولا مقصود بيها نغيظ حد إلا لو ديه اخلاقك
مش كل واحدة بتتعامل بتلقائية وبساطة تبقي ست سهلة إلا لو انت اللي مش محترم
مش كل حد ماعملش لايك أو كومنت علي صورتك أو كلامك قصده يتجاهلك أو يضايقك إلا لو ده اسلوبك مع الناس
مش كل حد ينزل اغنية يبقى معجب بكلماتها وبيوجه رسالة الي حد معين يمكن يكون معجب باللحن بالصوت وبس وإلا كان كل واحد قام بتأليف الاغاني لحسابه وعلي مقاسه
مش معني أن بنت بتنزل اغاني على صفحتها يبقي بتحب حد ده مسألة ذوق مش اكتر وهي ممكن تكون ولأ حبت ولأ عمره حصل دا ذوق فى الإختيار
وصلت الرسالة يا ستات يا رجاله يا صيادى الميه العكرة
