تركيبه فريده من نوعها
بقلم
ميرفت قاسم
شعب قمه التدين،، نصوم رمضان والعشر الاوائل من ذو الحجة وعاشورا ،،لكن فى نفس الوقت بعض من هذا الشعب يستعد للهلس والسهرات غير البريئة بعد غروب شمس اخر يوم رمضان.
احنا شعب قمه الثقافه لما نتكلم فى أمور الدين والدنيا نحب نفتي ونبدع ونجتهد ونسأل على أمل الوصول للإجابة اللي ترضينا و فى نفس الوقت قمة الجهل لو لمسنا أمر من الأمور المحظور إبداء الرأي فيها زى الأمور السياسية والرياضية على وجه الخصوص المناقشة بتقلب خناقة خاصة لو الموضوع مس الفريق الأحمر والأبيض يعني اهلي وزمالك
شعب تلاقى عنده فى كل شارع
كنيسه و جامع و برضوووو فى كتير من الاوقات مجرد تدين شكلي بعيد عن الفضيله ،،زى ما فيه الملتزم بالصلاة يوميا فيه اللي الصلاة بالنسبة له فى رمضان والعيد والجمعة
شعب تلاقى العالم بيقولك مصر فيها فتنة طائفية تخرج عليهم مصر بصداقة دامت سنوات وعشرة عمر بين جرجس و محمد اعز اخوات واصحاب منذ الطفولة
احنا شعب هتف مع ام كلثوم أصبح عندى الآن بندقية وانت عمرى وفى نفس الوقت غني السح الدح امبو،،
شعب استمتع بصوت ام كلثوم و حليم و فيروز،،وفى نفس الوقت شعب مهرجانات ومخصماك ابعد عني منيش طايقاك ،،شعب Yanni و عمر خيرت
شعب هايسيندا وقرية امواج ومنتجع عايدة وستيلا دي ماري الجونه،،وشعب الجماليه والدرب الاحمر و عزبه سعد وشبرا
احنا شعب الكل حاجه و ال أى حاجه
شعب حياته تساوي قعده القهوه و الطاوله و الشيشه وسهرة صباحي وفي نفس الوقت ،،شعب قلنا هنبني وادينا بنينا السد العالي والهرم وحفرنا بدل القناة اتنين
شعب يعرف يقول بابى و مامى ،،و شعب يا امااااا و يااباااا يا حاج وحاجة
عندنا ١٠٠ لهجه صعيدى بحراوى ولهجة أهل النوبة شعب حضارته ممتدة من آلاف السنين
شعب يقع و يقف فى ثانيه واحده مفيش استعمار قدر علينا لا استعمار ولأ أزمة اقتصادية
شعب كل ما الظروف تهدوا يقوم يعافر ويصلب طوله ويكمل مشواره
شعب عارف كل حاجه و اى حااجه
شعب وقت الشده جدع
شعب بطبعه حنون وعلى الفطرة
زكي بيلمحها وهى طايرة جدع وقت الأزمة بيسد عليه خفه دم بيقضي بها على اى مشكلة
تركيبه انسانيه كده فيها كل حاجه
علشان كده ربنا سترها معانا وبنخرج من اى أزمة بفضل الله وكرمه
احنا بلا فخر
شعب الكل حاجه و ال أى حاجه
احنا الكل في واحد
