بقلم: ميرڤت قاسم
الدنيا علمتني كتير واهم حاجة علمتهالي
بواقي فراخ اليوم، هي حشو صنيه البيتزا الغد
الفراوله الطريه اليوم ، هي عصير فراوله بلبن الغد
فوطه اليوم، هي حتة مطبخ الغد..
اعادة تدوير من التراث
مفيش حاجه تترمي
عادات مصريه اصيله
بل هى أيضا أصبحت عادات على مستوى العالم تجد ملوك وملكات أكبر دولة فى العالم انجلترا ومبدء إعادة تدوير الملابس القديمه فقد قامت ملكة انجلترا السابقة الملكة اليزابيث بارتداء فستان خلال حضورها مراسم احتفال فى أحد المهرجانات ثم قامت بارتداء نفس الفستان بعد إضافة شريط من الستان على الرقبة والاكمام والقبعة نفس الأسلوب توارثته الأميرة كيت ميدلتون بجعل اولادها يرتدون ملابس بعضهم زى عندنا فى مصر اللي عندها طفلين الصغير يلبس ملابس أخوه الأكبر منه
إعادة التدوير فن كل الستات تتقنه بمهارة وبيظهر دا فى الركن الخاص يالست فى البيت هو ركن المطبخ وكوميديا وده بيحصل تلاقي قطعة بيضه نضيفه موجودة بجوار الحلل فى المطبخ ايه ده بقى ده فانلة قطن بتاعة جوزها وهالله هالله على الفانلة زى ما بيقول عمنا مدحت شلبي الفانلة دى بقى بتطلع فيها غلبها لو زعلانه مع جوزها تمسك بيها الحلل السخنة عشان تلسعه على أساس أنه جوا الفانلة يعني وانتي ماسكة الحلة ما علينا خلينا فى إعادة التدوير
المطبخ مليان برطمانات فاضية كان فيها مربى كاتشب نرميها لا نعمل ايه اعمل فيها مخلل لما بنتي المتجوزة تيجي زيارة تاخد شوية مربى فراولة من اللي عملتها وشوية مخلل
ملايات السرير اللي اتقطعت تنفع اكياس مخدات بنطلون جينز رجله دابت تقص النص اللي في الجيوب وتعلقة فى المطبخ وتستغل الجيوب وتعملها شياله الموبايل احنا شعب بيحاول الاستفادة من كل الأدوات الموجودة بيطوع ظروفه عشان الحياة تمشي
مؤمن بمبدء اللي ما تحتاجش وشه النهاردة بكرة الزمن يحوجك لقفاه
