كتبت: ميرڤت قاسم
مفيش حد فينا معندوش حساب واتنين على الفيسبوك في منا اللي بيتفاعل مع الاصدقاء للتعارف وتبادل الخبرات وفي منا اللي بينسي همومه ويدخل يضحك ويهزر هرب من مشاكل وصغوطات الحياة اليومية
لما دخلت عالم السوشيال ميديا لقيت حاجات كتير غريبة عن حياتنا اليومية العادية اللي الغالبية العظمى بيعشها
دخلت جروب ستات البيوت لقيت انهم مختلفين تماما عن ستات البيوت العادية مثلا عندهم روتين التنظيف اليومي مختلف عن عندنا تماما اللي بيعملوه فى يوم واحد وتكلفته بنعمله احنا فى سنة فى المواسم والاعياد فى دخله رمضان وعيد الفطر وعيد الأضحى تحس مع جروب ستات البيوت دا انك ولأ مؤاخذة يعني معفن وعايش فى زريبة سوري على اللفظ لكنه حقيقي يعني احنا في العادى غسيل السجاد والستائر موسمي لانها اشياء صعبة فى تنظيفها ده ستات بتتكلم عن تنظيف يومي البيت كله بما في السجاد والستائر وغيره ودا صعب اكيد على انه يكون روتين يومي
دخلت جروبات الماميز لقيت حياة تانية خالص ولادى النهارده ميعاد الاكله كذا واللعبة كذا جدول للاكل اللعب النوم تعالي بقا شوفي الام العادية بعيد عن جروبات الماميز بيتنبح صوتها ماما انا جعان اصبر يا هيثم هحضر الغدا لا يا ماما انا هعمل نودلز انا هطلب بيتزا لا يا هيثم الحاجات ده مش حلوة ولأ صحية لا هطلب ويطلب وهى لا حياة لمن تنادي لا عارفة تحكم عليهم بلاش الاكل دا عشان مش صحى ولأ هى عملت لهم اكل صحي ولأ حاجة وعادى بيحصل كل يوم في بيوت كتير
دخلت جروب الهير والسكين كير لقيت واحدة بتقول نصائح للستات عن بروتين للعناية بالشعر والبشره انا شعري باستعمله شامبو مش عارفة ايه بالكيوى مفيد جدا للتقصيف لا انا الشامبو بتاعي بالكريز بس خدى بالك بيغير لون الشعر شوية شامبو ايه اللي بالكريز والكيوي يا جماعة مش لما ناكلهم الاول نبقي نغسل شعرنا بهم دا انا اكتر حاجة عملتها وحسيت اني ملكة الترفيه لما اخدت شامبو جونسون بتاع ابني غسلت به شعري ولقيته ناعم وحلو فرحت وعملت فيها نجمة وايه بقا السكين كير دا ماسكات للعنايه بالبشره والجسم بالوان السما السبعه وبفواكة الجنة دا انا اكتر حاجة عملتها ماسك للوجه انى كتمت وشي فى حلة ميه سخنه بتغلي وفوطة فوق دماغى
عشان انضف بشرتي من اى حبوب ولو دلعت نفسي شوية اعمل ماسك زبادى حتى ماما كانت تقولي يا بنتي خسارة الزبادي اللي بتحطيها على وشك ده قومي اضربيها على كام حبة فراولة طازجة فى الخلاط واشربيهم هتنور وشك اكتر يا هبلة الله يرحمك يا امى عليها نصايح اديني سمعت كلامك يا امى وبدل ما احط على وشي زبادى حطتها فى بطني وزاد وزني يا حاجة هههههههه
نرجع لبتوع الاسكين كير ونحت الجسم والناس الريقة اللي عايزين جسمهم زى باربي الوسط منحوت كام سنتمتر مش احنا الوسط عندنا اكبر من لفه الدائرى
تدخل جروب المتهمين بالتعليم وانت يا دوب خلصت دراستك الجامعية تلاقي بتوع الاتنين ماجيستير وتلاته دكتوراه زى الدكاترة ناصف سند ابو الفضل اعتقد دا كان اسمه الشخصية الكوميدية اللي قام بدورها يونس شلبي فى مسلسل عايز عروسة ودول كتير اوى تحس انك جمبهم زى ابوجهل تقول عايز انا كمان اعمل دراسات عليا زيهم عشان اكون نفس مستواهم العلمي والمركز الادبي تتشجع وبعد وقت بسيط تلاقي نفسك مليت من المذاكرة وتقول لنفسك انا هرجع تلموذ تاني هههههههه احنا نسينا شغل التلمذة دا وبعدين سواء جروبات الماميز او ستات البيوت الكيوت بتوع الروتين اليومي او جروبات الهير والسكين كير والاكل الصحي والدراسات العليا
كل الجروبات ده وطريقة حياتهم صعبة لسبب واحد لانها محتاجة اف ال اوس يعني فلوس زى ما كان حبيبنا الفنان الكوميدي الرائع اسماعيل ياسين بيقول
طيب انا اعمل مشروع يجيب فلوس طيب اعمل ايه تقعد تفكر طيب راس المال منين والبداية ايه تلاقي نفسك بتقول اشتغل كتير واحوش والنتيجة هى إن فلوس الشغل يا دوب بتكفي متطلبات الحياة العادية
تلاقي نفسك داخل فى جروب ديني واعمل ل اخرتك تقول لنفسك الحمد لله على كل حال
تنسي كل اللي قراته فى الجروبات كلها وتقول لنفسك الحمد لله على حياتي انا راضي بنصيبي من الدنيا
سيبك من كل المظاهر اللي بتشوفها على مواقع التواصل الاجتماعي وحاول تعيش حياتك بنفس راضية بما قسمه الله لك واعرف ان الدنيا مش فلوس ومظاهر لكنها راحة بال ورضا بما قسمه الله لك
