بقلم: ميرڤت قاسم
الشغل دلوقتي إما يوتيوبر، تيكتوكر، إنفلونسر، بلوجر، فيمينست، فاشونيستا، كوتش، فوتوجرافر، ميكب أرتست، وأشياء أخرى زي مهندس وطبيب وصحفي والحاجات البلدي دي!!
وعن تلك المهن نتحدث عزيزتي كيف تُصبحين بلوجر في خطوتين:
- قولي على البلوزه بلاوز
- والبنطلون سويت بانتس
ولو ميكب ارتست سهلة لبس البوصة تبقي عروسة شوية دهانات ورد على البارد وشوية مصطلحات بيتمنظروا بيها قدام الزبونة عشان تدفع من غير فصال ولأ مناهدة تلاقي الميكب ارتست نازلة رغي مع المساعدة بتاعتها هاتي البريمر العروسة المسكينة هو ايه دا لترطيب الوجه قبل كريم الأساس يا عروسة وبعدها الفاونديشن.
وايه دا كمان دا كريم الأساس عشان تبقي بيضة وحلوة ودا بيحصل فعلا العروسة بتكون بيضة لكن العريس هو اللي بيكاكي من الفواتير وخد عندك دا بلاشر ودا الآى بنسل ودا الآى شادو وغيره كتير النتيجة العروسة بقت عروسة مولد من كتر الألوان.
أما عن الزمن الجميل فلمن يتذكر منكم فيلم الزوجة الثانية كانت علبة الميكب بتاع فاطمة كانت قطعة قماش من التلي بها لون احمر بديل للمكياج للوجة والأبنسل ورق بها كحل بودر تشترى من السوق لتكحيل العين والحاجب وكانوا قمرات
أما عن الفوتوغرافي
فحدث ولأ حرج تلاقي واحد قاعد يعمل حركات بهلوانية وينام ويقف عشان ياخد الصور من زوايا مختلفة والنتيجة صورة للعروسة والخلفية اربع بنات ماسكين فى شعر بعض عشان الورد اللي العروسة رمته صورة تانية العريس ومن خلفة حماته وأمه وخناقة طايرة مجهولة السبب وصورة جانبية لبعض النساء يفكروك بفتحية كشرى فى لن اعيش في جلباب ابي ماسكين شنط ونازلين حفر وردم من البوفيه
زمان كانت صورة الزفاف لها قيمة العروسة بالفستان الابيض والطرحة والشوز الابيض الجميل مش الكوتشي وقعدة محترمة فى مكانها مش واخدة توكيل من نبوية كهربا وقعدة ترقص وتنط زى اللي عندها الزايدة والعريس بالبدلة الشيك صورة واحدة أنيقة وراقيه زى الزمن الجميل دا في المدينة.
أما عن الريف فجلسة التصوير ابسط جريد النخل خلفية للصورة ودكة خشب او كنبة اسطنبولي وهو دا المسرح بالنسبة لهم ويجي المصوراتي إذا كان في لو القرية متمدنه يجي ومعه كاميرا متغطية بقطعة قماش تفكرك بصندوق الدنيا اللي كان فى فيلم الحرام لسيدة الشاشة فاتن حمامة
أما عن اليوتيوبر
دا واحد أو واحدة غاوين لوك لوك بيفطروا ينزلوا صورهم يدخلوا المطبخ يعملوا اى اربع خمس عشر انواع خضار على بعضهم ويضربلك اسم اجنبي فتعتقد انت بقا أنها اكله ولأ اطعم ما هى من ورا شاشة انت شامم حاجة دقت حاجة وصدقني النتيجة هى اليخني بتاع عادل امام تيجي واحدة تانية تعمل نفسها بتعلمك تنضفي الشقة دا على أساس أن الستات مبتعرفش تنضف وتوضب بيتها وتفرشه احسن من اى يوتيوبر
تيجي واحدة تانية تعلمنا ازاي نعمل ماسك قال ايه ماسك تبيض الوجه بنشا الرز ولو دورت تلاقي أن الرز شاط منها وهى على التيك توك فقالت استفيد منه واعمله ماسك تبيض البشرة وعشان خدوك تحمر يا اوختشي اضربي عصير بنجر على كركديه مش شرب لا دهان يا اوختشي مرتين في اليوم روحي يا بعيدة الهي تدهني فولتارين
