كتبت: ميرڤت قاسم
جاي منين من الثانوية رايح فين عالكلية
مبروووك لكل أب وأم كانوا سند لأولادهم وقفوا فى ضهرهم بدون تعب ولا شكوى من مصاريف دروس خصوصية ولا ملازم كانوا ينزلوا يوصلوا الولاد فى عز البرد للسنتر عشان يرجعوا دروسهم
تحية لكل ام حرمت على نفسها النوم عشان تسهر مع ابنها او بنتها وهى بتذاكر
للنجاح طعم جميل خاصة النجاح بعد التعب
لكن للحياة حسابات تانية بمعني في كتير من الطلاب وأهاليهم تعبوا لحد ما وصلوا للنجاح بمجهودهم هل من العدل يكون في مساواة بين الطالب المجتهد وبين طالب مفتحش كتاب طول السنة
حدوث تجاوزات كتيرة فى امتحانات الثانويه العامه كما هى العادة فى كل عام تلاقي لجنة بكاملها نجحت بمجموع النسب قريبة من بعضها ليه بقى الطلاب دول كانوا بيخوفوا المراقبين وبالتالي اللجنة تكون مفكوكة مفاصلها سايبة
كل اللي معه موبيل يبعت الامتحان لمدرس المادة يحله ويبعت الإجابة على الموبيل والطالب ينقل
غير كمان اللي بيحصل فى بعض القرى وسطوة العائلات اللي عندهم اولاد فى الثانوية خد عندك بقا يا سيدى مجاملة للجنة تتمثل في مشروبات ووجبات سريعة
طبعا التجاوزات ده صعب ناخدها كقاعدة عامة ده حالات فردية
اكيد طبعا في نماذج كتير مشرفة الا من رحم ربي
هل من العدل المساواة بين طالب اجتهد وتعب ونجح بمجهودة وبين طالب غش وجاب مجموع عالي طب ازاي
والمشكلة يا ريت تنتهي على كده لا المشكلة بدأت بغش وتنتهي بكارثة
بمعني ازاي تكون حصلت على مجموع من الغش وتدخل طب اوهندسة فى الحالتين أرواح الناس في ايدك مينفعش طبعا تكون دكتور وانت ناجح بالغش ودا بيحصل للأسف أو مهندس ناجح بالغش ازاي
من الاخر اى حد جاب مجموع عالي بسبب الغش احسن له دخول كلية بعيدة عن أرواح الناس لأن أرواح الناس مش لعبة ويا ريت كل واحد يراجع إمكانياته واللي يقدر يعمله
في طالب بيحصل على مجموع بسيط في الثانوية العامة مجموع لا يصل لمجموع الاوائل لكنه بمجهوده دون غش ممكن جدا الطالب دا يحقق شهرة اكتر من الاوائل والناس تجري في الشارع عايزين يصور معاه وهاتلاقوه داخل علي اصحابة بالفراري
انا بحترم جدا الطالب اللي من النوع ده
حقق نجاح بمجهوده وعرف إمكانياته وقدر يوصل ودا احسن بكتير من طالب غشاش دخل مجال مش قد قدراته
مينفعش اغش وادخل طب انت ممكن تغش لكن الافضل لك تدخل كلية البوسطة فى طنطا زى سمير غانم فى فيلم عالم عيال عيال
