كتبت: ميرڤت قاسم
عايزة أسهر ليلة من ليالي الصيف في حفلة في البوريفاج يعزمني عليها رشدى أباظة حفلة تغني فيها أم كلثوم أنت عمري وأمل حياتي
و عايزة أشرب قهوة في حديقة الماريوت مع عمر الشريف ويحكي معايا ذكرياته يكلمني عن أول مرة قابل فيها فاتن والصعوبات اللي كانت واقفة فى طريقهم علشان يرتبطوا
و عايزة أروح سبق خَيل مع رشدي أباظة ونكسب ويعزمني بعدها على تروا بيتى كوشون فى جروبي .
عايزة اخد أجازة وأروح العجمى مع سعاد حسني وناديه لطفى ونسابق بعض .
عايزة عبد الحليم يغني لي الحلوة برموشها السودة الحلوة واحضر معاه بروفات قارئة الفنجان ونتناقش فى التعديلات اللي بيعملها للحن
و عايزة أتغدى في سميراميس مع عمر خورشيد والمعجبين يطلبوا منه يعزف لهم وبعدها نحضر عرض أزياء تقدم فيه رجاء الجداوي وليلى شعير احدث ازياء ويعلنوا أن الموديلات كلها موجوده فى شيكوريل والصالون الاخضر واقابل هند رستم عايزة اقول لها ليه عملتي كده فى قناوى يا هنومه
عايزة ألعب بلياردو مع أحمد رمزي.
و اركب مركب فى النيل مع كمال الشناوى
و أتعزم على حفلة راس السنة في بيت فريد الأطرش ويغني لي يابو ضحكة جنان ويقولي انا عملت لك الأغنية ده علشان خاطرك .
والصبح عايزة أفطر فول مع إسماعيل ياسين و عبد الفتاح القصري فى متحف الشمع وتمشي ورانا الست ام الشعور
نفسي كمان أستأجر أوضة فوق السطوح أنا و فاتن حمامة في بيت الست زنوبة ونعمل احلي كفتة رز
كمان عايزة اقابل ريه وسكينة عشان اعرف منهم هما ليه كانوا بيقتلوا النسوان دا كان كيف عندهم ولا كان جهاد ضد الاستعمار وياترى كانوا بيزفوهم زفة الانجليزي في العشة بجد والله ده حاجة 13 خالص آه والله
يا سلام بقا لو وانا ماشية فى النفق يظهر لي العفريت اللي كان فى الفانوس السحري وبقولي ليكي ست طلبات هقوله عايزة طلب واحد رجعنى الاربعينات وانا متنازلة عن أى طلبات أنا عايزة اعيش الزمن الجميل اللي عاشوه أبويا وأمي وجدي وجدتي عايزة لمه العيلة فى كل وقت مش فى المناسبات فقط عايزة أحفظ ملامح الناس اللي بحبهم مش احفظ صور ل اشخاص منهم الحقيقي ومنهم الوهم وانا عيني متعلقة فى شاشة بشوف الدنيا من خلالها
كل حاجة و ليها حاجة.
عماله أدور على أي سرداب ف البيت يرجعني 50 سنة
