بقلم/ ميرفت قاسم
أنت بتعاكسني بترسم عليا
دا شغل اسطوانات قديمة مشروخة
أنت بتكراش عليا
كلها تحمل معني واحد والمضمون واحد كلمة ”كراش“ Crush هو بنت أو شاب بيحاول يلفت نظر الطرف الآخر سواء كان الغرض من دا تسلية وقضاء وقت فراغ أو فرصة للتعارف الجاد كل طرف بيحاول يلفت نظر الطرف الآخر أنحصر مفهوم الكراش فى وقتنا الحالي على البنت الخجولة اللي مش قادرة تعترف بحبها للشاب أو حب من طرف واحد من جانب الشاب للبنت ومهما حاول أى من الطرفين لفت انتباه الطرف الآخر مفيش فايده لو فكرت حتي
تعمل check in في مكان حلو وتكتب feeling alone أبقى قابلني لو عبرك برضه.لأن أنت شخص مش فى دماغه
الفيمنست بمعناه واحدة ست بتدافع عن حقوق المرأة متبنية فكرة أن فى تفرقة فى التعامل بين الرجل والمرأة شوف يا سيدى بقا اللي بيحصل تلاقي بعض من الرجال حاولوا مناصرة المرأة والدفاع عن حقوقها أكتر منها ودا شئ مش مريح المرأة بالفعل أخدت حقها من الحرية منذ بدء الخليقة تعاليم الدين الإسلامي الحنيف بتقول كده المرأة لها ذمة مالية منفصلة لها الحق في قبول الزواج أو رفضه وغيره كتير من الحقوق وفى العصر الحديث أصبح لها صوت فى البرلمان وخرجت للتعليم وتولت أعلي المناصب في حقوق إيه أكتر من كده عشان الراجل يدخل جمعيات نسائية ويساند المرأة بدعوة الحرية
تنشك فى طربوشك يا قاسم يا أمين ماكنا قاعدين ورا المشربية وبنشوف الناس وننم عليهم و لا شغله ولا مشغلة ولا زحمة المترو وجرى عشان نلحق الشغل غير شغل البيت ومدارس الولاد والتدريب
الإكس يقصد بها الحبيب السابق شخص ارتبطت به وانفصلت إكس لما يفرمك يا بعيدة دا زمان كانت البنت لو صادفت صديق اخوها على السلم أو فى الشارع كانت بتموت من الخجل الوقت البنات تشوف الشاب من دول تحط عينها عليه تكرش عليه وتحكي لصاحبتها بكل فخر عن الواد المز الروش طحن ملحوظة الإكس دا مفيش له أى صفة لو كان زوج الأفضل نقول طليق أو خطيب سابق
ندخل على الشوجر دادي بقي ده حكاية كبيرة
بداية إعجاب من بنت لشخص أكبر منها في السن الإعجاب أتحول لحب ولو ربنا تمم الموضوع بيتجوزا فى بنات بتاخد الموضوع من باب الدلع انا ليه ارتبط بشخص من سني يغلبني وكل شوية خناق ومشاكل وممكن طلاق أنا أتجوز اللي اكبر مني عشان يدلعنى ويحقق أحلامي سفر وشوبنج ونوادي دى مش متجوزة عشان تعمل أسرة دى متجوزة عشان تتدلع في اللي بتتجوز الأكبر منها طمع في فلوسه لو هى من مستوي معيشي على قد الحال وعايزة ترفع مستواها لمستوى أعلى بتبيع شبابها بالفلوس الدراما قدمت نماذج كتير عن الشوجر دادي مش كلها نماذج طمع
في اللي بتحب بجد بصرف النظر عن فرق السن هى شايفة سعادتها مع الشخص دا مش متخيلة حياتها بدونه وبتقول لنفسها ياما جوازات كان فيها فرق فى السن بين الطرفين وكانت جوازت ناجحة شوفنا النموذج دى فى مسلسل كناريا وشركاه لما الأستاذة سهام روجينا اتجوزت سيد كناريا فاروق الفيشاوي ولما عمتها سالتها ليه تتجوزي الأكبر منك قالت لها عشان تعوضة عن كل التعب اللي شافه فى حياته كمان مسلسل ارابيسك ام حسن كانت اصغر من جوزها وكانت بتحبه جدا كانت بتقول اللي يطرف له جفن كان يوجع قلبي
ده بعض النماذج من المصطلحات الموجودة على مواقع التواصل الاجتماعي وللحديث بقية
