بقلم: ميرڤت قاسم
زمان كانت الستات عندهم عادة طريفة عاشها الكثيرون في الماضي كان فى حاجة يطلق عليها أسم المقابلة البونجورة لقاء بين الستات للفضفضة كل اللي عندها مشكلة تقولها والجميع يشارك في طرح حلول للمشكلة تجمع صغير لكنه يحمل كل معاني الحب والتقدير اللي بنتها مخطوبة وزفافها باقي عليه فترة بسيطة الف ست تمد أيدها للمساعدة مش مادية فقط فى صورة هدية لا معنويا يساعدوا أم العروسة يقضوا مشاوير نيابة عنها زمان كانت أغلب العرايس ملابسها تفصيل ومشاوير رايح جاي للخياطة والجهاز النهارده هنختار حاجة المطبخ بكرة الستاير وغيره كتير من تفاصيل الزواج كانت الجيران لبعضها الشقق مفتوحة في وش بعضها متعرفش الفرح فى اى شقة فيهم بنات بتلبس هنا ورجالة قاعدة بتجهز لكتب الكتاب هنا بوكيه ورد كبير هنا عند العروسة بوكيه تاني وتالت فى شقة الجيران عشان بيت العروسة زحمة فى اللقاء الأسبوعي كانت الحكاوي عن نجاح أحمد فى المدرسة وزفاف تهاني اللي بعد يومين وشقاوة رأفت اللي وقع من على السلم هكذا كانت لقاءات السيدات فى الزمن الجميل
فاكرين طبعا مسلسل زيزينيا لما عايدة عزمت إكرام أخت بشر على البونچورة يعني يفطروا سوا مع سيدات من الجيران عايدة أكيد كانت هنتكلم عن الموضة والأزياء والمكياج وممكن الحديث يتطرق للسياسة ومقاومة الإحتلال كمان فيلم أنا حرة نفس اللقاء الأسبوعي بتاع الستات فى بيت أم شكرى سرحان هنا كان في شوية مرح لما طلبوا من لبني عبد العزيز ترقص بغرض المرح والترفيه بنات وستات دا بجانب تناول كل الموضوعات الموجودة على الساحة حتى الفنانة جمالات زايد خالة معالي زايد كانت عاملة زى وكالة الأنباء اول ما دخلت اللقاء قالت لهم مين هتتجوز ومين طلق مراته وغيره من الأخبار
يعني مكنش الرقص شئ أساسي نرجع بقا لزمنا هنا ومبادرة هي الأغرب من نوعها مبادرة شخلعة خلف الأبواب المغلقة ده تجمع ستات الهدف من التجمع الرقص
ورشة عمل تلات شهور وبعدها حفل التخرج ترقصي على المسرح وسط تجمع نسائي من الأهل والأصدقاء تطلعي على المسرح وسط جمهور وتربيزات وجو كده قال ايه عشان تخرجي الطاقة السلبية اللي جواكي بعيد عن عيون الجنس الآخر
مش قادرة أعرف الهدف من المبادرة ده يعني كل مشاكلنا خلصت عرفنا نحلها وناقص بقا نتعلم الرقص مش عارفة صاحبة المبادرة ده فين من الدنيا صاحبة مبادرة شخلعة بتقول أن في رجالة بيشجعوا ستاتهم على الرقص من الآخر هى بتتعلم الرقص ليه ماهو عشان ترقص لي من هنا كان تشجيع الرجال لزوجاتهم عشان الإشتراك فى المبادرة لا وكمان بيوصلوا زوجاتهم للمكان المخصص للتدريب وينتظروا خروجهم المبادرة وصل عدد المشاركين فيها 36 سيدة مفيش اى شروط عشان الإشتراك صاحبة الفكرة بتقول أن دا تجمع نسائي للرقص الشرقي بهدف القضاء على الضغوط اللي بتتعرض لها المرأة وان مفيش شروط ولا مواصفات للستات المشتركة لا تفرق معاها لون او وزن أو سن
مبادرة غريبة من نوعها خرجت علينا من خلف الأبواب المغلقة ومابين مؤيد مقتنع أن تعليم زوجته الرقص يصب في مصلحته وما بين معارض بيقول دا حرام وانا مراتي مش رقاصة وأنا بقول أن المبادرة ده عمرها قصير الست صاحبة المبادرة مش عايش واقع الست المصرية اللي بتشتغل 48 ساعة فى الأربعة وعشرين ساعة ما بين شغلها وشغل البيت ومذاكرة للأولاد وتوصلهم النادى عشان التدريب فين وقت الفراغ اللي عندها عشان تتعلم في الشخلعة عشان تطلع على المسرح وتعمل فيها كاريوكا ولأ نبوية كهربة أقدر أقولك اللي هتلاقي وقت فاضي هترقص قدام المرايا وبكده هتكون خرجت الكبت اللي عندها ووصلت لقمة الشخلعة
