بقلم: ميرڤت قاسم
سهرات راس السنة 2025 كانت فوق الخيال البنات والستات اللي خرجوا لاستقبال عام جديد فكروني باحتفالات الهالوين شوفي يا ست الكل محدش مانع أنك تلبسي سوارية وتعملي مكياج لكن المعقول مفيش أحسن منه
عايزاكي تضعي فى اعتبارك أنك مش ياسمين صبري ولا هيفاء وهبي ولا نيكول سابا أبوس رجل ابوكي
لو وزنك زيادة مليانة يعني بلاش تلبسي فستان صغير قال يعني هيلم جسمك خدعوكي فقالوا أنك لو لبستي فستان أصغر نمرتين هتظهرى رشيقة لا والله العظيم هتظهرى أتخن فى فستان البظابيظ دا
وبعدين إيه يا بنات اللي انتوا عاملتوه دا ليه كل الدهب والألماظ والأكسسوارات ده كلها والنبي انتو كنتوا عايزين واحد فتوه يفز عليكم وياخد دهبكم دا يبيعوا لسي علي الصايغ ماشين لابسين اللي بيلمع واللي بيبرق واللي بيشخلل حيطمعوا فيكي يا حلوة منك ليها
بقا كل المكياج والبرفيوم والأكسسوارات والملابس المبالغ فيها دى لرأس السنة برضوا ولا خارجة فاكرة أنه موسم صيد العرسان لا والله اللي هيحصل برضوا إنك هتدخلي السنه single و تخرجى منها single
بمبدأ سلمني نضيف أسلمك نضيف نصيبك مش هيجي بالطريقة ده كل شئ مكتوب
انا شفت بنات حاطة روج بطريقة اسماعيل ياسين في الآنسة حنفي واكله صباع الروج وبعدين ليه مش عاملة الروج على حدود بقك ليه مزودة خارج حدود بقك دا على أساس إيه يا بنتي ده شفايفك مش شفايف أنجلينا جولي كل كوم بقا وحواجبك كوم تاني الحاجب الطبيعي فوق العين انتي بالقلم الفلوماستر عامله حواجب يوسف داود الله يرحمه ليه الرعب دا وكمان يا ريت تختارى لون العدسات اللي يليق عليكي والا هتبقي زى ما يكون واحدة هاربانة من فيلم العائدون من الموت بعدين لما تلبسي فستان ممكن تختارى موديل واحد مش ستين تصميم فى واحد تبقي عاملة زى عروسة المولد كده وشعرك حاولي تعملي شئ بسيط وبلاش الوان الطيف والمنكوش والمحجبة بلاش والنبي القصه الصفرا اللي باينه من الطرحة ما هو يا محجبة يا مش محجبة
ندخل بقا على النقاشة والتشطيب السوبر لوكس وشك لو على المحارة بلاش تنقشي فيه كتير
مثلا حبيبتي لو انتي سمراء وعايزة تقلبي شقرا خدى بالك من درجة الفاونديشن اللي هتستعمليه يعني كفاية يكون فاتح درجتين مثلا مش افتح من لون بشرتك ١٠ درجات لأن وقتها شكلك هيكون زى اللي مركبه راس على رقبة وودان بتاع حد تاني وهتبقي شبه الحلة البرستو
سنة سعيدة علينا وعلى الكل
