كذب المنجمون ولو صدقوا انا
عايزة أعمل بودكاست حد هيقولي إيه ده أقوله دا برنامج عشان اللوك لوك في منه الفردى يعني اتنين يرغوا مع بعض أو مسرحي أو تعليمي يقدم محتوى هادف تعليم لغة مثلاً إحنا بقا أخذنا بود كاست المائدة المستديرة عشان بنحب اللمه يعني مصطبة فلاحي زى اللي كانت عندنا فى الريف ناس بتقعد ومعاها ضيوف وينزلوا بنشرة الأخبار ويمسكوا موضوع معين يقطعوا فروته ههههه زى قاعدة الستات زمان وجلسات النميمة مين اتجوز مين مريض مين ربنا رزقه بمولود انا بقا عايزة كل أسبوع اقعد مع ناس يسمعوني وأنا بتكلم وألت وأعجن
بلدنا مصر المحروسة فى عيون الفضائيات بقت بودكاست ويوتيوبر وبلوجرز زى شيماء اقسم بالله اللي شوفناها رمضان الماضي فى مسلسل أعلي نسبة مشاهدة وكورة اللي بيفهم واللي مش بيفهم يجي يقعد فى وشنا وهات يا رغي يقولك بيحلل المباراة ليه يا خويا هى تعبانة لا قدر الله والدكتور طلب منها تحلل الناس عايزة تتابع الماتش ودا يجي يقف فى وشك ويصرخ فى ودنك كل ما لاعب يصد الكورة يا عم إحنا شايفين أسكت أنت وأسفة على اللفظ بس ظهرت كمان طبقة وشها مكشوف أوى متسولين تيك توك بتوع كبس كبس دول فضحتوني منكم لله الراجل من دول يخرج علينا قاعد جنب مراته وهى بتعمل حلة المحشي وهو بيحسبن علي الناس اللي مش عجبهم المحتوى اللي بيقدموا طالع متأثر أوى وبيقول إحنا هنستمر رغم أنف الحاقدين دا على أساس أن مجدى يعقوب غيران منك ولا بينك وبين نجيب محفوظ عداوة أخدت منه نوبل وبيهاجمك في إيه يا حاج روق شوية هو أنت تطلع تقولنا كبس كبس عشان تلم فلوس وقال إيه لهم عمله خاصة بهم ودهب وأسد آه والله اسد وبالدولار وليلة كبيرة مش فاهمة أولها إيه وآخرها إيه مش عارفة غير أنه تسول يمكن اللي بيربط رجله أو عينه مثلاً ويطلب مساعدة أكرم منكم مصر فيها ايه تاني موضه اليومين دول صوص بيستاشيو
ودا بقا إيه واكل الجو في كل برامج الطبخ على أساس أنه فول سوداني مثلا مين بقا اللي كل ما هتعمل حاجة حلوة هتستعمله وبعدين ياختي استعملي الفستق كده وخلاص مش لازم تعدلي في ده جبنه كريمي دا حليب مكثف هو الفستق حلو لوحده مش لازم الإضافات دى
مؤخراً ظهرت علينا كمان شخصية أم العريف وبعد ما كانت أم واحدة بقت ام أربعة وأربعين واحدة كتروا أوي طبعاً شغل مربح بدون مجهود وهى قاعدة مكانها وأحنا شعوب طيبة وبتصدق وكل حاجة بنرجعها لعالم الغيبيات أم العريف ده بقا يا سيدي ست خجولة بتوشوش الودع يعني هى النسخة المعدلة للست بتاع أبين زين واوشوش الودع عشان بيتكسف واشوف الحظ والتانية تقولك بحلب النجوم ليه يا ختي هى بقرة هتحلبيها ناقص المرة الجاية لما ييتضيفوا واحدة تيجي راكبه لنا مكنسة زى الساحرة الشريرة الغريب بقا هو رد فعل المذيع او المذيعة اللي بتستضيف أم العريف بتكون مذبهلة وفاتحة بقها زى العبيطة ومصدقة
هى الدنيا بتتقدم ولا بترجع لورا إحنا عاملين بالظبط زى العربية اللي بتقول احذر السيارة ترجع إلى الخلف واحدة تخرج علينا فى الفضائيات وتقولنا سنة 2025 هيموت فيها شخصية مهمة طبيعي يا ماما ما هى سنة طويلة عريضة جبتي التايهة أنتي بقا وشخصية معروفة هتتجوز برضوا عادى ودولة هيحصل فيها كذا برضوا مفيش جديد الدوشة المحيطة بالعالم مش الشرق الأوسط بس بتقول كده عايزة تعملي أم العريف وبتفمهي فى الكفت الا هو إيه الكفت دا يا ام العريف يكونش قريب الكفتة بس مين فيهم اللي بتتشوي ولأ ام رز ولأ ام أربعة وأربعين سؤال يحير جاوبي بقا أو استعيني بصديق يكون شيف شاطر
أرحمونا انتوا فضحتونا مصر مش بتوع التيك توك والبلوجر وشوية الناس اللي السوشيال ميديا إصابتهم بحالة جنون عشان الدولار أتمني يعملوا قانون يجرم كل المنصات دى أو على الأقل يكون فى قيود على المحتوى المقدم على المنصات دى ربنا يسترها علينا وعليكم ويحمي أولادنا وبناتنا من هوس الدولار
