عاجل من وزارة الحب والشؤون الغرامية
اليوم الجمعة أول ايام عيد الحب ينعاد عليكم بالسهوكة والمحن
دى بقى خطتي ل الفلانتين يا جماعة اللي يحب يساهم فى عمل خيري إحنا نلم من بعض عشان خطر على بالي نشتري 100 ثور وهنزلهم بإذن الله تعالي يوم الڤلانتين يجروا وراء اللي لابسين أحمر
ولا اقولكم بلاش خليهم يفرحوا ويكملوا الكذب للآخر ناس بتحتفل بعيد الحب وهما مش طايقين بعض النص منفصل والنص الثاني مكمل عشان الولاد ما علينا طبعاً دى مش كل النماذج نرجع للاحتفال
وبما أنى سينجل والفلانتين هيعدى عليه بكأبه لازم أخرج نفسي منها الحاجة مرات أبو أم الاختراع قدحت زينات فكرى ده واحدة صحبتي متعرفوهاش هههه خطرت على بالي فكرة تسلية ومكسب وده طبعاً لأني بحب الأستثمار ومبحبش وقت الفراغ شوفوا يا ستات يا حلوين أى واحدة عايزه تعيش الدور وترجع نونو صغنونو تاني ممكن تسيب عيالها وتخرج تقضي الفلانتين بمزاج تتفضل المواعيد من ٨ مساءاً الى ٥ صباحاً والساعه ب 500ج للعيل شامله وجبة أساسية وسناك وتسالي وألعاب واحتمال فيلم كارتون
واللى عايزه تخرج مع المقروص فى قلبه حبيبها وعايزه تضحك على أمها دى بقى لها عندى خطة جهنمية ما تخرش الميه وبسعر رمزي يا دوب 5000 جنية وده أرخص سعر عندى والأداء ماقولكيش مافيش بعد كده ودى خطة من كتير شوفي بقى يا ست البنات أنتي هتكتشفي فجأة أن الدكتور طالب منكم أبحاث فى اليوم اللي انتي غبتي في فاكرة يا ماما ساعة طلبتي مني أغيب عن الكلية عشان عايزة تعملي حلة محشي ل بابا قالك عليها من شهر فات اليوم دا الدكتور طلب مننا أبحاث وأنا معرفتش غير النهاردة انا بكرة طول اليوم هكون مع صاحبتي عشان نعمل البحث ده خطة من عشرة يا ست البنات وربنا الرازق يا ولاااااااد إفرجها علينا يااااارب
ملحوظه وتعديل لو مستكترة ال 5000ج خلى المحروس اللى هيخرجك يدفع او إتلمى وأقعدى فى بيتكم وأنت
عزيزي الزوج شوف بقى ايها الفرعون المصرى الصغير والكبير لما مراتك تقولك عايزة هدية عشان عيد الحب
قبل ان تفكر فى هدية لمراتك فى الفلانتين
فكر كده ثواني و قول لنفسك بكل صراحة هى تستحق الهدية ولا لا أدخل على الأسئلة وجاوب يا كبير
مين اللى كان بيسحب الغطا فى عز البرد من عليك علشان تدفى هي
مين اللى كان بيأكلك بالعافية فى أول جوازكم وكنت زى فار التجارب تاكل اشكال هيكلية محشي بالزلط وملوخية ساقطة فى الامتحان وكفتة محروقة وأنت مش قادر تنطق رز شايط مفيش مانع مكرونة معجنة متقولش لاء وتخليك تاكل في المطبخ عشان ماتوقعش علي السجادة أكل ولو وقعت حاجة تاكلها غصب عنك
مين اللى بيلبسك بنطلون وقميص مش مكويين وكأنهم خارجين من حادثة علشان مبتعرفش تكوى
مين اللى لسعتك بالملعقة فى ايدك ودبت السيخ المحمي فى صرصور ودنك عشان تحرم تتوشوش فى الموبايل فاكر يوم ما سمعتك بتكلم بنت غيرها حصل و لا لأ يا فرعون
مين الى ياما أكلت ف جنابك كلام من أهلك بسببها
مين اللى كان بتسيبك ترن ع الكنبة لوحدك من غير غطا لما تغضب منك لسه عايز تجيب هدية ولا رجعت فى كلامك ربنا يقدرنا على فعل الخير
كل سنة وانتوا طيبين يا حلوين
