بقلم: ميرفت قاسم
رجب الجريتلي المعروف بإسم ماجد المصري شخصية لمعت فى سماء الفن بعد مسيرة فنية فى السينما والمسرح والتلفزيون بمجموعة متنوعة من الشخصيات فهو الشاب الوسيم المدلل فى مسلسل لدواعي أمنية الذي فقد ثروته وأجبرته الظروف على العمل كحارس خاص لشخصية هامه وهو المحب المغلوب على أمره فى مسلسل التوأم مع ليلي علوى ظهر علينا مؤخراً فى شخصية رجب الجريتلي وبالرغم من أن دوره في العمل تاجر مخدرات ونصب على واحدة ست وأخد الملهى الليلي منها وأخفي عنها وجود إبنتها إلا ان الناس كلها متعاطفة مع حبه ل أش أش الناس نسيت كل عيوبه ومعجبين جدآ بشخصيته الراجل اللي بيحمى الست اللي بيحبها ومتابع أخبارها بعد إنفصالهم ورجع لها عشان ما تعملش حاجة مش بتحبها الراجل الغيور أبو دم خفيف الكريم اللي فتح خزنته قدامها وقالها اى شئ تتمني وجوده أشتريه الناس تقبلت شخصيته علشان المزايا ده يعني طول مدة عرض الحلقات رجب لم يصدر منه أى كلام خارج حدود الأدب كمان مفيش حد ذكر أسمه فى موضوع سرقة كبارية إخلاص أم أش أش بذرة الخير الموجودة عنده وجدت قبول عند الناس
وأثارت تساؤل عند الكل يا تري رجب هيتوب عن تجارة المخدرات ويبدء من جديد مع أش أش ولا هيكمل تجارته فى المخدرات ويتم القبض عليه وينال عقابه الناس قبلت شخصية رجب رغم عيوبه اللي يعاقب عليها القانون قبلته يمكن عشان افتقدنا الرومانسية في حياتنا أصبحت الحياة جافة خالية من أى مشاعر دوامة بندور فيها كل يوم دراسة بيت جيم شغل فلوس المصايف المدارس النادى الإمتحانات التدريب دوامة خلتنا نرمي نفسنا فى حضن الرومانسية حتى لو مع تاجر مخدرات
الستات حبت رجب لما فتح ل أش أش الخزنه قالها هاتي أى حاجه نفسك فيها أو عينك تيجي عليها حبوا في العطاء لكن محدش عمل حساب الظروف المادية رجب مليونير إنما الغالبية مننا ناس عادية مستوي مادي مقبول مستور اللي قارنت بين رجب وجوزها عند فتح الخزنه وبتقول جوزى بقا بيقولي مدي إيدك خرجي الهدوم اللي فى الدولاب وشوفي اللي عايز يتغسل
رجب يا جماعة أصبح كراش كل الأوقات والأعمار والبلدان
الستات عجبها رجب رغم أنه تاجر مخدرات عجبها ستره ل أش أش اللي أعترفت له اعتراف زى الزفت يوم زفافها لكنه سترها البنات حبت رجب اللي رجع ل إخلاص أم أش أش الفلوس اللي أخذوها منها علشان يبطلوا رقص ويقعدوا فى البيت البنات حبت رجب اللي اى حد كان يفكر يرمش بس لمراته كان يبهدله فين يا جماعه اللي زى رجب كده فى اللي بتقول هو أنا لازم أكون رقاصة و اتوب علشان أتجوز واحد زى رجب
الحقيقة إن الست عايزة الراجل اللي تحس معاه أنها أنثي وتحس برجولته فى تصرفاته ومواقفة مش مهم ملامحه ولا عمره المهم تحس معه بالأمان والحماية والرجولة فى افعالة وتصرفاته اللي تملي عينها وتطمئن قلبها
