بقلم: ميرفت قاسم
أغلي كعك الكيلو 2500 جنيه ليه معرفش إيه مكوناته غير دقيق وسمن وسكر والمكون العجيب الغريب القادم من الفضاء الخارجي البستاشيو زمان كان الكعك بالملبن وعليه سكر الوقت بالبستاشيو وغريبة باللوز بقت بالوايت شوكليت واللوتس يا جماعة الكعك بالملبن أو العجمية ريحة السمن تشمها من على بعد أنتو ليه بتغيروا فى الثوابت يا عم احشي الكعك عين جمل كفاية إنما إيه اللون الأخضر والطعم الغريب دا
فى نوع تاني مشهور أرخص شوية كعك بالفستق كان حلو قبل كده الكيلو 2400
ليه أسعار الكعك غالية عشان الاختراعات اللي عملوها تعرفوا أن المصريين أول من أبدع فى صنع الكعك وأن أقدم كعكه فى التاريخ في مقبرة رخمى رع من الأسرة الثامنة عشر موجودة في المتحف البريطاني تحت رقم 5345 الكعكه ده مخبوزة بالتمر والحبوب ومزخرفة إحنا أول من اخترع الكعك كان أسمه شعت ويقدم فى مهرجان ديني فى بداية العام الجديد
بالمناسبة بقا انا عندى علبة كعك وبيتي فور رشة سكر بره للبيع
لدواعي السفر
العلبة موديل 2025
الكيلو عامل معاها 2600 وانا هعملكم خصم 300 جنية انتهزوا فرصة نسيت فى كمان كيس بيستاشيو لونه اخضر زرعي يسر العين
معلهش سؤال جوهري
هوا اللي مكتوب على علب الكعك دا تاريخ الصلاحية
ولا مقدار السعرات الحرارية
والله أنا عايزة أروح أعمل كشف نظر عشان أصدق الأسعار ده كيلو ب 2500 ليه
ده لو محشي هيروين مش هيبقى كده والله يا جماعة الخير ما فيش أجمل من الكعك بتاعنا الطبيعي بدون افتكاسات ولعب في الثوابت
