فيك عشرة كوتشينة

بقلم/ ميرفت قاسم

فيك عشرة كوتشينة في التراسينا
مسميات مختلفة في لغتنا العربية يقال عليها شرفة وفي اللغة الفرنسية بالكون وفي اللغة الإيطالية تراسينا
وهي الشرفة الصغيرة الحجم مثل الشباك واصل الكلمة إيطالية “Terrazzina”
وهى تصغير للتراس

نماذج البلكونة كثيرة نجد بيت السحيمي وزينب خاتون وبيت الكريتلية كلهم عبارة عن فناء مفتوح ونافورة ومشربية تطل على الفناء الداخلي احتراما لخصوصية النساء فى المنزل
دى بقى البلكونة اللي غني لها عبد الوهاب الطقطوقة المشهورة فيك عشرة كوتشينه واللي عمرها 96 عام من كلمات محمد يونس القاضي الحان وغناء محمد عبد الوهاب
منيرة المهدية كمان غنت للبلكونة أغنيه إرخي الستارة اللي في ريحنا البلكونة زمان كانت التراسينا  حديقة بمعني الكلمة قصاري الزرع والشلت الملونة وقفص العصافير الأصحاب يهربوا من حراراة الجو للمذاكرة فى البلكونة وشرب القهوة وأحياناً الهروب لشرب سيجارة كما شاهدنا فى مسلسل سابع جار هى خروجه البنات زمان بمعني البنت تلبس أشيك ما عندها وتقف فى البلكونة ساعة العصاري و فى الصباح لنشر الغسيل فى المساء ل استعراض شياكتها أمام المارة خاصة البنات اللي على وش جواز ست البيت كانت بتهرب من حر المطبخ أحياناً لتنظيف الخضار فى البلكونة وفى المصيف تحلي القعدة فيها يعني إيه بلكونة يعني قاعدة رايقه ساعة عصاري وشوية شاى بالنعناع المزروع فى البلكونة يعني أغنية رايقة من الزمن الجميل لثومة او حليم مع نسمة هوا ساعة المغربية محملة بريحة النعناع والريحان
البلكونة لها علاقة بالرومانسية فى أفلامنا القديمة مثلاً فيلم عاشت للحب كانت البلكونة همزة الوصل بين الدكتور حسني وحبيبته عن طريق شجرة اللبلاب المحيطة بالبلكونة هى كمان كانت همزة الوصل فى فيلم شحات الغرام ل محمد فوزى وليلي مراد وعمرنا ما ننسي أشهر بلكونة فى العالم بلكونة روميو و جوليت فى مدينة فيرونا الإيطالية المصممة على
طراز الباروك وهو اشهر طراز تم تصميمه لأشهر بلكونة فى العصر الكلاسيكي
إحنا كمان عندنا مكان تحفة فى وسط البلد اعتمد ديكوره على النظام القديم تشعر أنك انتقلت لفيلم عربي قديم فى دوار العمدة والمشربية الديكور معمول بزعف النخيل بلكونة هتنقلك للزمن الجميل زمان كانت القعدة فى البلكونة بيتحكى فيها كل أخبار اليوم الزوج يعرف من زوجته أخبار الولاد عاملين إيه فى دروسهم محتاجين حاجة ولا لاء البلكونة كان يحلي فيها السهر والسمر يا سلام على عشرة كوتشينه اللي يخسر فيها يتحكم عليه لو بنت تقوم تحضر العشا وتعمل دور شاى بعد العشا لو ولد ينزل يغير ازازة البيبسي
المتضايق يقول
هخرج أشم هوا فى البلكونة يعني تغير المزاج وكأنها جزء منفصل عن البيت ومشاكله جزء مريح لتجديد المزاج سنة1911 نشر بوتشيني لوحته الايقونيه الشوارع تدخل النافذة وهى لوحة لسيدة تتكئ على سور بلكونه فى منزلها وده دليل على أهمية وجود البلكونة وأثره في حياتنا فهى الواجهة المطلة على الحياة خارج حدود المنزل منها تعرف أخبار الجيران خلال مرورهم بالشارع هى أيضاً زى الشات اللي بنعمله اليومين دول تداول أخبار النميمه
البلكونة لها تاريخ فى الكفاح والنضال السياسي زمان كان أغلب الزعماء بيلقوا الخطب منها
هى وسيلة تواصل مع الجماهير من خلال إلقاء الخطب السياسية لجأ إليها الزعماء للتواصل مع الشعب ولا ننسي عندما غنى الإيطاليون أغنية بيلا تشاو وداعا ايتها الجميلة كانت أغنية المقاومة خلال الحرب العالمية الثانية كانت البلكونة هى المنفذ الوحيد ل الإيطاليين للتعبير عن رأيهم للتواصل مع الجماهير
من بلكونة القصر الامبراطوري فى ڤينا أعلن هتلر ضم النمسا خلال الحرب العالمية ومن بلكونة قصر باكنجهام أعلن تشرشل نهاية الحرب
ولا ننسي دور البلكونة أثناء وجود الكورونا كانت وسيلة التواصل بين الجيران بالغناء والعزف فى البلكونة
للقضاء علي الشعور بالملل والعزلة
كانت هى المتنفس الوحيد لتغير المزاج هى عمرها ما كانت مكان للكراكيب والخزين وربط البصل وتعليق التوم ولأ مساحة تستغل كغرفة إضافية للتوسعة البلكونة هى رئه المنزل المتنفس الوحيد لتغير المزاج وانت فى مكانك يا ريت نرجع نهتم بتصميم البلكونة في المباني الحديثة
اعترافاً بدورها فهى أكبر من كونها مكان للكراكيب