ساحل ومسحول انا الساحل وانت المسحول
كتبت: ميرڤت قاسم
عبد الحليم كان بيقول ايه اضحك ارقص غني قد ما تقدر عيش دى اللحظة اللي تعدى بتروح متجيش هنا الوضع مختلف تماما مفيش مانع نضحك نرقص نغني بطريقة طبيعية إنما اللي بيحصل اوڤر اوى
عزمتني صديقة على الساحل فى الشالية بتاعها فى قرية امون قلت حلو اهى حاجة من ريحة الاجداد كتر خيرك يا جدى حاسس بحفيدتك وبعت لها دعوة عبر الزمان علشان تشوف الناس اللي فوق بيصيفوا ازاي صاحبتي قعدت تعلمني بعض المصطلحات كده عشان ما يبنش عليا اني من بتوع المصايف الشعبية وشط اسكندريه يا شط الهوي اللي بكتيرنا نروح المنتزة نتصور هناك وناخد معانا سندوتشات كبدة من الفلاح وبعدها نضرب ايس كريم من عزه ما علينا شوفوا قالت ايه
لازم تعرفي المكان اللي هنروحه اسمه ايه وبلاش شغل المصطبة دا قرية ده تقولوها لو بتتكلموا عن قرية أعضاء هيئة تدريس الوقت كل مكان وله اسم دلع زي ديبلو و ستلا و حنيش،حتي لما تيجي تدخلي مكان اوعي تنسي نفسك وتفتكري انك داخلة مركز شباب ابوكبير فتقومي مطلعة الكارنية
.الوقت بقا اسمة باس او كيو ار كود علي موبايلك وده بيكون منحة لا ترد من صندوق
الهبات صديق لك يمتلك حق الإقامة فى دولة الساحل الشقيق
.عايزة تشربي قهوة بلاش تقولي تركي او فرنساوي او مانو دي ممنوعة تماما لأنك تعتبرى كده من رواد قهوة بعرة ولا الحرافيش ولا البورصة كافية انسي كل ده
القهوة فى الساحل فلات وايت كراميل أو كابتشينو سكيمد سمول لو قلت غير كده اعتبرى نفسك كتكوت وقع فى الميه هتقفي مبلولة ومتلخبطة وانتى بتكلمى الباريستا
ده ولا مؤاخذة ( القهوجي) يعنى ده بقي غير نظرات المحيطين بيكى وكأنك هبطتى عليهم من كوكب تاني
عقلك يقولك اطلب ايس كريم اهو حاجة معروفة اوعى تفتكرى نفسك عند چيلاتى لبنان ولا الشيخ وفيق لا هنا في حاجات تاني زى كرملايزد الموند او سولتد كراميل .
بحضر شنطتي وماسكة الشبشب بتاعي الفوشيا بقولها اشتريته جديد لزوم الروشنة واحنا على البحر قالت لي ما اسمهوش شبشب قلت له طيب اقول ادلعه واقوله ببش زى الفت اخر زوجات الحاج متولي قالت لا اسمه
ال flip flop اللي هو برضوا شبشب بصباع
لسه بحط كريم نيڤيا المتوارث من ايام امي وبقولها متقدريش تقولي حاجة على ده
بقا ده نيفيا معروف في العالم كله قالت لي لا انا معايا
ال Sun kisses تسلخات
الله هو احنا اطفال عاملة بي بي وعندها تسلخات طيب يا اوختشي ما تاخدى معاكي بودرة اطفال للتسلخات قالت نو ده تسلخات منن قنديل البحر jelly fish
سكت وافتكرت الولاد على الشط في ميامي وهما بيسحلوا قنديل البحر من ايده ورجله وبيلعبوا بيه السمكة الميته
بقولها دا للتسلخات افرضي قابلنا حوت هنعمل ايه ده احنا هنبقي كفته دخلت بيا فى موضوع القرش الازرق فى الميه يناديني نحو الاعمق ومن
القرش الحوتي shark نقلت على كرش من نوع اخر منحني السعادة وشوفي بقى انا عارفة انك بتحبي الالش اوعي تشوفي واحدة حامل وتقولي الست ام كرش ده لابسة مايوة ليه الكرش يعني bump
كرش الحمل اسمه baby bump وكرش الرجاله اسمه daddy belly
وخدى بالك اوعي تقولي على حمام السباحة بسين اسمه pool
لو هتسمعى موسيقي يبقي لترانسات او despacito او shape of you جو المهرجانات بقى واختياراتي مدمرة حياتي وسطلانة نو مفيش الحاجات دي
الرقاصة belly dancer
بقولها هتكون احسن من نبوية كهربه اشهر رقاصة فى الاربعينات دا احسن منهم كلهم
ده حتى الفشار ماسلمش من الفرنجه وبقى اسمه pop corn
او cotton candy
لا انا عايزة درة مشوي من الراجل اللي بيقول حمام يا درة وغزل البنات ايه ده اوعي تقولي إنه هنا مفيش راجل بيمشي يزمر وهو بينادى على غزل البنات ازعل اوى لو لقيت غزل البنات ماشي لواحدة افرضي حد غزله
الجمبري جمبرى بس في محل سوشي اسمه shrimps
المهم انه جمبري ده لو حتي اسمه بعجري حد يعرفني عليه ومنه له جاي رايح منه له محدش يتدخل بينا لو شفتي الخازوق
.. My ex اللي وكنتي مصاحباه
ودا يجي معانا ليه اكس لما يلهفه ولا العصير ياناس بقي سموزى
الفول والطعمية بقي اسمهم oriental breakfast لا والطعميه بقي Green Burger
الطعميه الا كده الله يرحمك يا عم جمعة كان عليه شوية طعمية عجب ولا لما الولاد الشغالين اللي عنده يتوصوا بيا كان الواد فجلة يغمزلي بعينه كده ويقولي كيس المخلل دا هدية مني لست البنات
البلغة أو السابوه اسمه crocs لا بقا اسمهم
الشبشب الخدوجة الزنوبة القبقاب ولكنكم تحبون الفرنجة
دوختني معاها فى مصطلحات الساحل سحلتني
لقيت نفسي بقول انا لا عايزة البس شورت ولأ برانيط ولا سلاسل واقعد اخد لون برونزي وانا شعري منكوش زى امنا الغولة انا عايزة مصيف عادى من بتوع زمان
بحر ورمل بالنهار وتمشية على الكورنيش بالليل واحنا بناكل مشبك وايس كريم
توب علينا يا رب من الصيف وبلاويه واللي بيجري فيه
