بقلم: ميرفت قاسم
موزة مغطاة بشريط لاصق ب 6 مليون دولار
والله يا خويا انا اكتر حاجة اعرفها
كشرى الموز دا بقا صنف حلو للناس اللي غاوي أكل الذويقه
ميكس عجيب ينقلك عالم تاني
رز بلبن مع موز غرقان في الكريمه والميلفيه وصوص الكراميل يا عيني على الدلع
موزة ب 6 مليون طبعا حقها تشوف دلالها علينا ماهو من ساعة ما شنط المدرسة بقا فى حاجة إسمها بانانا جارد تمنها فوق ال 300 جنية والموز شاف دلاله ما انت عملت له أوضة اهو يا سيدى فى شنطة المدرسة قال إيه عشان الموزة ما تتفعص فى الشنطة يا سيدي سبها تتفعص يمكن تتعلم الأدب وتعرف حدودها ماقولناش حاجة يا سيدي عارفين أنك بتتقشر بسهولة ومفيش بذر ومش محتاج غسيل بس خف علينا شوية سته مليون يا لهوي دا انا روحت أكلت فرينش توست بكريمة شيكولاته ومحشيه شرائح موز دفعت 200 جنية موز إيه يا جدعان دا جبت الغلاوة منين دا أنت أكل القرود وكمان زهقوا منك وبيغيروا وياكلوا سوداني دا أنت بتفضل قدامي على رخامة المطبخ لما تتحول لهريسة وآخر ما أزهق منك أضربك على زبادي وأعملك ماسك لشعري تعرفوا إن فى موز مشوي أسمه بيسانج إيبي بيتعمل فى مدينة فى أندونيسيا بيتشوى زى الذرة على الفحم وبعدين يفعص الموزة المشويه ويبططها زى التوست وأنت ومزاجك بقا يحطلك عليها شيكولاته مربى عسل والله واتدلعت يا موز وربنا ل اعمل لكم لوحه ببذر اليوسفي والبرتقال بشرط هرسم الواد صاحب اللوحة أم ست مليون دا وأنا برمي البذر فى قفاه مزاجي بقا وهتطلع لوحة حلوة هو أنت هتفن اكتر مني
انا بقا نفسي انفتحت على موزه بس من نوع تاني هقوم أعملها على صينية بطاطس وادسها فى الفرن مع شوية رز بشعرية وسلملي على الموزه بتاعتك والله
جاي على بالي أرمي قشرة موز فى أخر المقالة ده يمكن راجل حليوة كده يتزحلق فى القشرة ويشتريها مني ب 215 جنيه بصراحة مزنوقة فيهم
الفنون جنون واحد حس بالجوع آكل موزه ولزق القشرة بشريط لاصق فى معرض فى الخارج أعتبروها عمل فني وتم بيع اللوحة ب 6 مليون دولار
الفنون جنون
عقبال لوحة بذر اليوسفي بتاعتي يا رب دعواتكم معايا وهشوفكم بسباطة موز بحالها
