11 رسالة من القلب
بقلم: احمد عبد الفتاح حافظ
رسالة لكافة أجهزة ومؤسسات الدولة وكل حزب في مصر مفعمة بالصدق والحب من العقل والقلب وبالله التوفيق اقول…
(1) لأمتي حيفضل أهم شيئ عند كل مشتاق قعدة ع المنصة وترتيب الكراسي زي ماانت راسي وفين موقعي في الرصة بالذمه ده اللي ح يبني مستقبل وطن؟!!ٕ……
(2) بكلمتين لمن يهمه الامر ح أقولهملك بأدب في ودانك ولكل اللي وراك واللي قدامك ارفع راسك متمدش رجليك أمسك فاسك احرث ارضك ماتخليش الوقت يفوتك ألحق طلع بإيديك زارعك عشان تلقي قوتك ازرع قطنك وبمصنعك أغزل توبك ويقينا هي دي الف باء واول حروف الهجاء اللي ح نبني بيها مستقبل الوطن ….
(3) مش بانحناء نجري للأسياد لاجل ننفيذ توجيهات دون مناقشة لأننا نؤمن انه مش بس (بنعم) وحاضر وطيب تبقا حاضر وقريب ممكن كمان (بلا ) بموالاة ومعارضة تكتمل الصورة وتلتئم المنظومة مش بتبرع واللا باجري اوام واشحت وهات ح نبني مستقبل الوطن.!
(4) مش بالحنجلة والرقص ومش بالفهلوة والهجص مش باللمة والمنظرة مش بالزحمه والفشخرة وناس بكل جنس ولون مش بطوابير وصراخ وزعيق بحناجر قعدة واللا واقفه جنب بعض بتترص بالذمه ده اسلوب ممكن يبني مستقبل الوطن ؟!
(5) نعم اكيد بخطط مدروسة ودراسات جدوي موضوعه ببرامج وجداول زمنية محطوطة مع أهداف مخطوطة نلقي مردود تحس بيه الناس وهو دا المطلوب والكلام المظبوط عمرنا ما ح نعرف نسجل الأهداف إلا إذا كان التسديد بين التلات خشبات وكمان بميزان مظبوط بنشوط عندها باليقين سنستطيع أن نبني مستقبل الوطن ….
(6) وعشان نبقي في دوله بجد متخليش أي حد ياخد علينا لقطة واللا حد يشد علي الوطن الأمطة لابد لكل موقف أو حدث يقع أو إشاعة تطال توب الوطن ببقع لابد أن نجد المسئول يسارع وعلي الفور بالتوضيح وحال وقوع أي خطأ أوام نشوف صاحب القرار بالحق والحقيقة نطق بالاعتذار ثم بالتصحيح بكده ممكن نبني بجد مستقبل الوطن…
(7) مصر مش عايزه بوهيجي كل شغلته التلميع ومهمته الحشد والتجميع ولا مانع من أن يلوي الحقايق بالتميع أو التوقيع مستخدما إسلوب العصا والجزره أو بالتجويع والترويع ومش مهم الدولة تقع ومش مهم الوطن يضيع هل هذا سلوك أو أسلوب يصب في صالح الإنطلاق نحو بناء مستقبل للوطن
(8) مصر محتاجه صنايعيه اسطوات وعايزه ورشجيه بس كمان مهم يلاقوا الخامات بسعر مناسب ونشوف دولة للحيتان واقفه بجد وبجد بتحاسب وياريت نخفف شوية عليهم الاعباء ونتابع أخبارهم والانباء وحال سوقهم ماشي في رواج واللا واقف لكساد (جود واللا باد) حته انجليزي من افتكسات اخونا (ابراهيم كمال أصل معرفش ليه لقيته قدامي جالي وفي الحال جه علي بالي) وياريت نعرف كمان ايه هي الأسباب وازاي نعالج بداية من المداخل وصولا للمخارج
بكده ممكن نبني بحق الله مستقبل الوطن..
(9) وخلونا نضيفلكم علي الكلام كمان فقرة مش معقول نقوم من حفره نقع في نقرة مطلوب وضوح وصراحة في كل ساحة وباحة مش تسفيه ببجاحة وقباحة فاكرينها نصاحه..
لأجل نبني بجد مستقبل للوطن …
(10) وهو ينفع اجزجي عمره ما يوم دخل معمل يركب دوا واللا ينفع حد مش فاهم الأحداث يطلع ويتكلم علي الهوا لازم القرار قبل مايطلع يكون مدروس مش بس تبرعات هات أدفع فلوس لاجل ناس علي الشعب تدوس وناس نجري عليها نحضن ونبوس لازم الشعب من الرأس للكعب يبقي سيد قراره بليله ونهاره في ديوان وكل مكان لاجل نفك إساره ونرفع عنه حصاره وكمان انحساره….
بكده ممكن نبني مستقبل للوطن
(11) مش عايزين مراهقين سياسين يتصدرون كل مشهد باي من المناصب التي يجب أن يتوسدها في كل المجالات أهل الخبره مش أهل الثقة ويظل التخصص والاحتراف هو الذي يحب أن يسود ويظل سيد كل قرار لا نختشي من حد ولا من حد نخاف شبعنا بقا جوع في كل هدف وقرار الموضوع مش كلام وحلول لا تغني ولا تسمن من جوع ونترك الوطن يتألم ولسه الشعب موجوع بس لازم نفضل نقول تحيا مصر بس لازم نكمل ونقول تحيا مصر بالشعب من اول الراس حتي الكعب لأجل نعدي ونخوض كل طريق صعب بإيد في إيد بإراده حديد في كل مجال لازم نتعلم ونجيد اكيد مفيش محال بالوعد مش بالوعيد بفعل وواقع مش بكلام واقع نخفف ألام المواطن ونقيم جسر للثقة بين الدولة والحكومة والمواطنين كل موضع وموقع
إن أردنا بجد أن نبني مستقبل لهذا الوطن
واسمحوا لي قبل أن اختتم هذا المقال أن أسلط الضوء علي جميع المتفوقين من شباب مصر الواعد في الجامعات ومراكز البحث العلمي في كل مجال ولا ننسي ابناءنا من أصحاب المواهب الخاصة في مدارسنا الفنية وعلي كافة التخصصات وفتح الطريق لبناء مستقبلهم العلمي والعملي والتطبيقي وتخريج اجيال يفخر بهم الوطن ويتباهي …
وهكذا نستطيع أن ننطلق علي بركة الله بالفعل لنبني مستقبل الوطن..
والله دوما ولي التوفيق
